ലൈംഗിക പീഡന കേസില് സിവിക് ചന്ദ്രന് ജാമ്യം അനുവദിച്ച കോഴിക്കോട് സെഷന്സ് കോടതിയുടെ പരാമര്ശത്തിനെതിരെ ദേശീയ വനിതാ കമ്മീഷന്. കോടതിയുടെ പരാമര്ശങ്ങള് അതീവ ദൗര്ഭാഗ്യകരമെന്ന് ദേശീയ വനിതാ കമ്മീഷന് ചെയര്പേഴ്സണ് രേഖ ശര്മ്മ. വിധിയിലെ ദൂരവ്യാപക പ്രത്യാഘാതങ്ങള് കോടതി അവഗണിച്ചുവെന്നും രേഖ ശര്മ്മ പറഞ്ഞു.
സിവിക് ചന്ദ്രന് മുന്കൂര് ജാമ്യം അനുവദിച്ചുകൊണ്ടുള്ള കോഴിക്കോട് സെഷന്സ് കോടതി ജഡ്ജി എസ്.കൃഷ്ണകുമാറിന്റെ ഉത്തരവ് വിവാദമായിരുന്നു. യുവതി ലൈംഗികാകര്ഷണം ഉണ്ടാക്കുന്ന വിധത്തിലുള്ള വസ്ത്രം ധരിച്ചതിനാല് പീഡനത്തിനുള്ള 354 എ വകുപ്പ് നിലനില്ക്കില്ലെന്നായിരുന്നു കോടതിയുടെ വിവാദ പരാമര്ശം. പരാതിക്കാധാരമായ സംഭവം നടന്ന ദിവസം പ്രതി ഹാജരാക്കിയ ഫോട്ടോകള് തെളിവായെടുത്താണ് കോടതി ഇങ്ങനെ പറഞ്ഞത്.
കേസില് ആഗസ്ത് 12നാണ് സിവിക് ചന്ദ്രന് മുന്കൂര് ജാമ്യം നല്കിയത്. എന്നാല് ഉത്തരവിന്റെ പകര്പ്പ് കഴിഞ്ഞ ദിവസമാണ് പുറത്ത് വന്നത്. സെഷന്സ് ജഡ്ജിയുടെ പരാമര്ശത്തിനെതിരെ ഹൈക്കോടതി രജിസ്ട്രാര്ക്ക് പരാതി നല്കാനാണ് പരാതിക്കാരിയുടെ തീരുമാനം.