വേതനവര്‍ധനയും ആനുകൂല്യങ്ങളും ആവശ്യപ്പെട്ട് സമരം ചെയ്യുന്ന ജീവനക്കാര്‍ക്കെതിരെ മുത്തൂറ്റ് ഫിനാന്‍സിന്റെ പ്രതികാര നടപടി. സമരം ചെയ്ത 12 പേരെ മാനേജ്‌മെന്റ് പുറത്താക്കി. 10 പേര്‍ക്ക് സസ്‌പെന്‍ഷന്‍ നല്‍കുകയും ചെയ്തു. ജീവനക്കാരുടെ മനോവീര്യം തകര്‍ക്കാനുള്ള ശ്രമമാണിതെന്നും മുന്നോട്ടുതന്നെ പോകുമെന്നും സമരത്തിന് നേതൃത്വം നല്‍കുന്ന നോണ്‍ ബാങ്കിങ് ആന്റ് പ്രൈവറ്റ് ഫിനാന്‍സ് എംപ്ലോയീസ് അസോസിയേഷന്റെ (സിഐടിയു) സംസ്ഥാന സെക്രട്ടറി നിഷ കെ ജയന്‍ 'ദ ക്യൂ'വിനോട് പ്രതികരിച്ചു. സമരം ശക്തമായി തുടരുന്നതിന്റെ പ്രതികരണമാണിത്. എംഡി ജോര്‍ജ് അലക്‌സാണ്ടര്‍ മുത്തൂറ്റിനെതിരെ ഫേസ്ബുക്കില്‍ പോസ്റ്റിട്ടതിന്റെ പേരിലാണ് ഒരു ജീവനക്കാരനെ സസ്‌പെന്‍ഡ് ചെയ്തിരിക്കുന്നതെന്ന് നിഷ ചൂണ്ടിക്കാട്ടി.

സമരം ചെയ്യുന്നവരെ മാനസികമായി തളര്‍ത്താനുള്ള ശ്രമമാണ് മാനേജ്‌മെന്റ് നടത്തുന്നത്. പക്ഷെ അത് മാനേജ്‌മെന്റിന്റെ ആഗ്രഹം മാത്രമാണ്. കഴിഞ്ഞ കുറച്ച് ദിവസങ്ങളായി നടപടിയെടുത്തത് ഒറ്റ വാര്‍ത്തയായി വന്നതാണിപ്പോള്‍. 2016ല്‍ 51 പേരെ സസ്‌പെന്‍ഡ് ചെയ്തിരുന്നു. ഞങ്ങള്‍ സമരം ചെയ്ത് തിരിച്ചുകയറുകയും ചെയ്തു. 20 പേര്‍ക്കെതിരെ മുമ്പ് നടപടിയെടുത്തിട്ടും ഫ്‌ളാഷ് ന്യൂസ് വന്നിരുന്നില്ല. ഇനി കമ്പനിയുടെ സര്‍ക്കുലറും നാളെ ഫ്‌ളാഷ് ന്യൂസായി വരുമായിരിക്കും. സമരം ശക്തമായി തന്നെ തുടരും. ഇന്നേക്ക് 25 ദിവസമായി. അടുത്ത ആഴ്ച്ച തൊഴില്‍ മന്ത്രി ടി പി രാമകൃഷ്ണന്‍ വിളിച്ചുചേര്‍ക്കുന്ന ചര്‍ച്ചയില്‍ പ്രതീക്ഷയുണ്ടെന്നും നിഷ കെ ജയന്‍ കൂട്ടിച്ചേര്‍ത്തു.