ആനക്കൊമ്പ് കേസില് വനം വകുപ്പിന്റെ കുറ്റപത്രത്തിനെതിരേ മോഹന്ലാല് ഹൈക്കോടതിയില് സത്യവാങ്മൂലം സമര്പ്പിച്ചു. ആനക്കൊമ്പ് സൂക്ഷിക്കുന്നതിന് തനിക്ക് അനുമതിയുണ്ട്. അതുകൊണ്ട് വനം വകുപ്പ് സമര്പ്പിച്ച കുറ്റപത്രം നിലനില്ക്കില്ലെന്നും കേസ് തന്റെ പ്രതിച്ഛായ മോശമാക്കാന് ശ്രമിക്കുന്നുവെന്നും മോഹന്ലാല് സത്യവങ്മൂലത്തില് പറഞ്ഞു.
ആനക്കൊമ്പ് സൂക്ഷിക്കുന്നതിന് അനുമതിയുണ്ട്. ലൈസന്സിന് മുന്കാല പ്രാബല്യമുണ്ട്. അതുകൊണ്ട് തന്നെ ആനക്കൊമ്പ് സൂക്ഷിക്കുന്നതില് നിയമ തടസമില്ല. കൂടാതെ ഈ ഒരു സംഭവത്തിലൂടെ പൊതുജനമധ്യത്തില് തന്റെ പ്രതിച്ഛായ മോശമാക്കാന് ശ്രമിക്കുന്നുമോഹന്ലാല് കോടതിയില്
ആനക്കൊമ്പ് കൈവശം വച്ച കേസില് മോഹന്ലാലിനെ പ്രതി ചേര്ത്ത് വനംവകുപ്പ് പെരുമ്പാവൂര് മജിസ്ട്രേറ്റ് കോടതിയില് കുറ്റപത്രം സമര്പ്പിച്ചിരുന്നു. മോഹന്ലാലിന് അനുകൂലമായാണ് വനംവകുപ്പ് ഹൈക്കോടതിയില് മൂന്ന് വട്ടം റിപ്പോര്ട്ട് നല്കിയിരുന്നത്. വന്യമൃഗ സംരക്ഷണ നിയമത്തിലെ വകുപ്പുകള് മോഹന്ലാലിന് ഏതിരായ കേസില് ബാധകമല്ലെന്ന നിലപാട് ഏഴ് വര്ഷത്തിന് ശേഷമായിരുന്നു വനംവകുപ്പ് മാറ്റിയത്.
ആനക്കൊമ്പ് കൈവശം വച്ചതും കൈമാറ്റം ചെയ്തതും വന്യജീവി സംരക്ഷണ നിയമപ്രകാരം കുറ്റകരമാണെന്നാണ് വനംവകുപ്പ് പെരുമ്പാവൂര് മജിസ്ട്രേറ്റ് കോടതിയില് സമര്പ്പിച്ച കുറ്റപത്രത്തില് പറയുന്നത്. 2012ലാണ് വനംവകുപ്പ് കേസ് രജിസ്റ്റര് ചെയ്തിരുന്നത്.
ആനക്കൊമ്പ് പരമ്പരാഗതമായി കൈമാറി ലഭിച്ചതാണെന്ന മോഹന്ലാലിന്റെ വാദം ശരിയെന്നായിരുന്നു ഫോറസ്റ്റ് ചീഫ് കണ്സര്വേറ്റര് ഹൈക്കോടതിയില് ആദ്യം റിപ്പോര്ട്ട് നല്കിയത്. നാല് ആനക്കൊമ്പുകളുടെ ഉടമസ്ഥാവകാശം മോഹന്ലാലിന് നല്കിയതായുള്ള സര്ട്ടിഫിക്കറ്റ് റദ്ദാക്കണമെന്ന ആവശ്യം ഉള്പ്പെടെയായിരുന്നു എറണാകുളം ഉദ്യോഗമണ്ഡല് സ്വദേശി എ എ പൗലോസിന്റെ ഹര്ജി. ആനക്കൊമ്പ് സര്ക്കാരിലേക്ക് മുതല്ക്കൂട്ടണമെന്നും ഹര്ജിയില് ആവശ്യപ്പെട്ടിരുന്നു.
തൃപ്പുണിത്തുറ സ്വദേശി കെ കൃഷ്ണകുമാറില് നിന്ന് 65,000 രൂപ കൊടുത്ത് ആനക്കൊമ്പുകള് വാങ്ങിയതാണെന്നായിരുന്നു മോഹന്ലാലിന്റെ വിശദീകരണം. ആനക്കൊമ്പ് സൂക്ഷിക്കാന് ലൈസന്സ് ഇല്ലാത്ത മോഹന്ലാല് മറ്റ് രണ്ട് പേരുടെ ലൈസന്സിലാണ് ആനക്കൊമ്പുകള് സൂക്ഷിച്ചത് എന്നായിരുന്നു അന്വേഷണസംഘം കണ്ടെത്തിയത്. കേസില് മോഹന്ലാലിന്റെ ഹര്ജി അടുത്ത ദിവസം കോടതി പരിഗണിക്കും.
‘ദ ക്യു’ ഇപ്പോള് ടെലഗ്രാമിലും ലഭ്യമാണ്. കൂടുതല് വാര്ത്തകള്ക്കും അപ്ഡേറ്റുകള്ക്കുമായി ടെലഗ്രാം ചാനല് സബ്സ്ക്രൈബ് ചെയ്യാം