സ്ഥിരം വൈകിയെത്തുകയും ഒപ്പിട്ട ശേഷം ഓഫീസില് നിന്ന് മുങ്ങുകയും ചെയ്യുന്ന സര്ക്കാര് ഉദ്യോഗസ്ഥര്ക്ക് ഇനി പിടിവീഴും. എല്ലാ സര്ക്കാര് ഓഫീസുകളിലേയും ജീവനക്കാര്ക്ക് ബയോമെട്രിക് പഞ്ചിങ് നിര്ബന്ധമാക്കിക്കൊണ്ടുള്ള സംവിധാനം സംസ്ഥാന സര്ക്കാര് ഉടന് നടപ്പിലാക്കും. പഞ്ചിങ് മെഷീന് നിര്മ്മാതാക്കള്ക്ക് ടെന്ഡര് ക്ഷണിക്കാന് സര്ക്കാര് കെല്ട്രോണിന് നിര്ദ്ദേശം നല്കി.
സര്ക്കാര് ഓഫീസുകളില് പഞ്ചിങ് നിര്ബന്ധമാക്കാനുള്ള നീക്കത്തിന് വര്ഷങ്ങളുടെ പഴക്കമുണ്ട്.
പഞ്ചിങ് ശമ്പള വിതരണ സംവിധാനമായ സ്പാര്ക്കുമായി ബന്ധിപ്പിക്കും. നിലവില് സെക്രട്ടേറിയറ്റില് മാത്രമുള്ള ഈ സംവിധാനമാണ് മറ്റ് ഓഫീസുകളിലേക്കും വ്യാപിപ്പിക്കുന്നത്. 50 ജീവനക്കാരുള്ള ഓഫീസുകളില് വാള് മൗണ്ടഡ് മെഷീനുകള് സ്ഥാപിക്കും. 20ല് താഴെ ഉദ്യോഗസ്ഥര് ഉള്ളിടത്ത് കമ്പ്യൂട്ടറില് ഘടിപ്പിക്കാവും വിരലടയാള സ്കാനറാകും വെയ്ക്കുക.
സര്ക്കാര് ഓഫീസുകളിലെ ഉച്ചഭക്ഷണ ഇടവേളയില് 15 മിനുറ്റ് കുറച്ചുകൊണ്ടുള്ള ഉത്തരവ് കഴിഞ്ഞയാഴ്ച്ച ഭരണപരിഷ്കാര വകുപ്പ് പുറത്തിറക്കിയിരുന്നു. ഒന്ന് മുതല് രണ്ട് വരെയായിരുന്ന ലഞ്ച് ടൈമിലാണ് മാറ്റം വരുത്തിയത്. ഇപ്പോള് ഒന്നേ കാലിനാണ് ഉച്ച ഭക്ഷണസമയം ആരംഭിക്കുക.