സ്വപ്‌ന സുരേഷിന്റെ ആരോപണങ്ങളില്‍ പ്രതികരണവുമായി മുന്‍ മന്ത്രി കെ. ടി ജലീല്‍. മുംബൈയിലെ ഫൈജാക്ക് ലോജിസ്റ്റിക്‌സുമായി ജലീലിന് ബന്ധമുണ്ടെന്ന സ്വപ്‌ന സുരേഷിന്റെ സത്യവാങ്മൂലത്തിലെ ആരോപണത്തിലാണ് ജലീലിന്റെ പ്രതികരണം.
'തിരുനാവായക്കാരന്‍ മാധവ വാര്യരായത് നന്നായി. വല്ല കുഞ്ഞിപ്പോക്കരിന്റെയോ മറ്റോ പേര് പറഞ്ഞിരുന്നെങ്കില്‍ കെണിഞ്ഞേനെ!,' എന്ന് ജലീലില്‍ ഫെയ്‌സ്ബുക്കില്‍ കുറിച്ചു.
കോണ്‍സുല്‍ ജനറലുമായി അടുത്ത ബന്ധമുള്ള കെ.ടി. ജലീല്‍ 17 ടണ്‍ ഈന്തപ്പഴം സംസ്ഥാനത്ത് എത്തിച്ചുവെന്നും മുംബൈയിലെ ഫ്‌ളൈ ജാക്ക് ലോജിസ്റ്റിക്‌സ് വഴി കെ.ടി. ജലീല്‍ ഈന്തപ്പഴം ഇറക്കുമതി ചെയ്‌തെന്നുമാണ് സത്യാവാങ്മൂലത്തില്‍ പറയുന്നത്. മുംബൈ ആസ്ഥാനമാക്കി പ്രവര്‍ത്തിക്കുന്ന ഫ്‌ളൈജാക്ക് ലോജിസ്റ്റിക്‌സ് കമ്പനിയുടെ ഉടമ മാധവ വാര്യര്‍ തന്നോട് പറഞ്ഞിട്ടുണ്ടെന്നും സ്വപ്‌ന സത്യവാങ്മൂലത്തില്‍ ആരോപിക്കുന്നുണ്ട്.
സംസ്ഥാനത്തേക്ക് എത്തിച്ച 17 ടണ്‍ ഈന്തപ്പഴം ഇറക്കുമതി ചെയ്തതില്‍ ചില പെട്ടികള്‍ക്ക് വലിയ ഭാരം ഉണ്ടായിരുന്നു. ഇതില്‍ പല പെട്ടികളും അപ്രത്യക്ഷമായി. ഖുര്‍ ആന്‍ ഇറക്കുമതി ചെയ്തു എന്നും സത്യവാങ്മൂലത്തില്‍ ഉന്നയിക്കുന്നു.