പൗരത്വ ഭേദഗതി നിയമത്തിനെതിരെ സംസ്ഥാന സര്ക്കാര് സുപ്രീംകോടതിയില്. നിയമം റദ്ദാക്കണമെന്ന് ആവശ്യപ്പെട്ട് സംസ്ഥാന സര്ക്കാര് സുപ്രീംകോടതിയില് ഹര്ജി നല്കി. ആദ്യമായാണ് ഒരു സംസ്ഥാനം നിയമത്തിനെതിരെ കോടതിയെ സമീപിക്കുന്നത്. ഭരണഘടനയുടെ അനുച്ഛേദം 131 പ്രകാരമാണ് സര്ക്കാരിന്റെ ഹര്ജി. നിയമം വിവേചനപരവും ഭരണഘടനാവിരുദ്ധവുമാണെന്ന് കേരളത്തിന്റെ ഹര്ജിയില് പറയുന്നു.
ദ ക്യു’ ഇപ്പോള് ടെലഗ്രാമിലും ലഭ്യമാണ്. കൂടുതല് വാര്ത്തകള്ക്കും അപ്ഡേറ്റുകള്ക്കുമായി ടെലഗ്രാം ചാനല് സബ്സ്ക്രൈബ് ചെയ്യാം
പിബി യോഗത്തിനായി കഴിഞ്ഞ ആഴ്ച മുഖ്യമന്ത്രി ഡല്ഹിയില് എത്തിയപ്പോള് നിയമ വിദഗ്ധരുമായി ഇക്കാര്യം ചര്ച്ച ചെയ്തിരുന്നു. ഇതിന് ശേഷമാണ് ഹര്ജി ഫയല് ചെയ്യാന് തീരുമാനിച്ചത്. സംസ്ഥാന ആഭ്യന്തര വകുപ്പിന്റെ ചുമതലയുള്ള അഡീഷണല് ചീഫ് സെക്രട്ടറിയാണ് ഹര്ജി ഫയല് ചെയ്തിരിക്കുന്നത്. സുപ്രീം കോടതിയിലെ സംസ്ഥാത്തിന്റെ സ്റ്റാന്ഡിങ് കൗണ്സില് ജി പ്രകാശ് മുഖേനയാണ് ഹര്ജി നല്കിയിരിക്കുന്നത്.
ഭരണഘടനയുടെ 14-ാം അനുച്ഛേദ പ്രകാരമുള്ള തുല്യതയുടെ ലംഘനമാണ് പാര്ലമെന്റ് പാസാക്കിയ നിയമമെന്ന് കേരളത്തിന്റെ ഹര്ജിയില് പറയുന്നു. മുസ്ലീം ജനവിഭാഗത്തോട് ഒരു വിവേചനം നിയമത്തിലൂടെ ഉണ്ടാകുന്നുവെന്നും ഹര്ജിയില് പറയുന്നുണ്ട്. നേരത്തെ പൗരത്വ നിയമം പിന്വലിക്കണമെന്നാവശ്യപ്പെട്ട് സംസ്ഥാന നിയമസഭ പ്രമേയം പാസാക്കിയിരുന്നു. മുഖ്യമന്ത്രി പിണറായി വിജയന് അവതരിപ്പിച്ച പ്രമേയം സഭ ഐകകണ്ഠ്യേനയാണ് പാസാക്കിയത്.