എ ഗ്രൂപ്പിന്റെ രഹസ്യ യോഗം നടക്കുന്നത് അറിഞ്ഞ് റിപ്പോര്ട്ട് ചെയ്യാനെത്തിയ മാധ്യമ പ്രവര്ത്തകര്ക്ക് നേരെ കോണ്ഗ്രസ് നേതാക്കളുടെ കയ്യേറ്റ ശ്രമം. കോഴിക്കോട് കല്ലായിലാണ് സംഭവം.
വനിതാ മാധ്യമപ്രവര്ത്തകര് അടക്കമുള്ളവരെയാണ് കോണ്ഗ്രസ് നേതാക്കള് കയ്യേറ്റം ചെയ്തത്. ഇന്ന് രാവിലെ സ്വകാര്യ ഹോട്ടിലില് എ ഗ്രൂപ്പിന്റെ യോഗം ചേരുന്നുണ്ടെന്ന് അറിഞ്ഞാണ് മാധ്യമപ്രവര്ത്തകര് റിപ്പോര്ട്ട് ചെയ്യാനെത്തിയത്. പ്രകോപനമൊന്നുമില്ലാതെയാണ് കോണ്ഗ്രസ് പ്രവര്ത്തകര് ആക്രമണം നടത്തിയെതെന്ന് മര്ദ്ദനത്തിനിരയായ മാധ്യമപ്രവര്ത്തകര് പറഞ്ഞു.
മാതൃഭൂമി പത്രത്തിന്റെ ഫോട്ടോഗ്രാഫര് സാജന് വി നമ്പ്യാര്ക്കാണ് ആദ്യം മര്ദ്ദനമേറ്റത്. ഒപ്പമുണ്ടായിരുന്ന ഏഷ്യാനെറ്റ് ന്യൂസിലെ സി.ആര് രാജേഷ്, കൈരളി ടിവിയിലെ മേഘ മാധവ് എന്നിവരെ കോണ്ഗ്രസ് പ്രവര്ത്തകര് തടഞ്ഞു വെക്കുകയും ചെയ്തു. മാധ്യമ പ്രവര്ത്തകരുടെ മൊബൈല് ഫോണ് പിടിച്ചുവെച്ച സംഘം വനിതാ മാധ്യമപ്രവര്ത്തകയെ ഭീഷണിപ്പെടുത്തുകയും ചെയ്തു.
യോഗത്തിന് നേതൃത്വം നല്കിയ യു. രാജീവനില് നിന്ന് വിശദീകരണം തേടുമെന്നാണ് പ്രസിഡന്റ് കെ. പ്രവീണ് കുമാര് പറഞ്ഞത്. നെഹ്റു അനുസ്മരണ യോഗം എന്ന പേരിലാണ് പ്രവര്ത്തകര് എത്തിയത്. എന്നാല് ചേരുന്നത് വിമത യോഗമാണെന്ന് അറിഞ്ഞതോടെ ഒരു വിഭാഗം കോണ്ഗ്രസ് പ്രവര്ത്തകര് വിവരം മാധ്യമ പ്രവര്ത്തകരെ അറിയിക്കുകയായിരുന്നു. മാധ്യമപ്രവര്ത്തകര് യോഗ ഹാളിന് പുറത്ത് എത്തിയത് അറിഞ്ഞതോടെ പ്രകോപിതരായി ഇറങ്ങിയ കോണ്ഗ്രസ് പ്രവര്ത്തകര് മാധ്യമപ്രവര്ത്തകരെ അക്രമിക്കുകയായിരുന്നു.