സംസ്ഥാനത്ത് തീവ്ര മഴയ്ക്ക് സാധ്യത, 11 ജില്ലകളില്‍ ഓറഞ്ച് അലേര്‍ട്ട്
സംസ്ഥാനത്ത് പരക്കെ തീവ്രമഴയ്ക്ക് സാധ്യതയെന്ന് കാലാവസ്ഥാ വകുപ്പിന്റെ മുന്നറിയിപ്പ്. 11 ജില്ലകളില്‍ ഓറഞ്ച് അലേര്‍ട്ട് പ്രഖ്യാപിച്ചിട്ടുണ്ട്. തിരുവനന്തപുരം തൊട്ട് കോഴിക്കോട് വരെയുള്ള ജില്ലകളിലാണ് ഓറഞ്ച് അലേര്‍ട്ട്. വയനാട് കണ്ണൂര്‍ ജില്ലകളില്‍ യെല്ലോ അലേര്‍ട്ടും പ്രഖ്യാപിച്ചിട്ടുണ്ട്.
ഇടുക്കിയില്‍ ഹൈറേഞ്ച് മേഖലയിലും എറണാകുളം മലോയരമേഖലയിലും കനത്ത മഴയാണ് പെയ്തുകൊണ്ടിരിക്കുന്നത്. കുട്ടനാട്ടില്‍ കനത്ത മഴയില്‍പലയിടത്തും വെള്ളം കയറി.
പത്തനംതിട്ട ജില്ലയില്‍ കനത്ത മഴ തുടരുകയാണ്. 12 മണിക്കൂറിനിടെ 10 സെന്റിമീറ്റര്‍ മഴ ലഭിച്ചുവെന്നാണ് കണക്ക്. ജില്ലയിലെ പ്രധാന അണക്കെട്ടുകളെല്ലാം നിറഞ്ഞിട്ടുണ്ട്. കക്കി, ആനത്തോട് ഡാമില്‍ ഇന്നലെ വൈകിട്ടോടെ തന്നെ റെഡ് അലേര്‍ട്ട് നല്‍കിയിട്ടുണ്ട്.
അറബിക്കടലില്‍ രൂപം കൊണ്ട ന്യൂനമര്‍ദ്ദം കേരള തീരത്ത് എത്തിയതിനെതുടര്‍ന്നാണ് പരക്കെ മഴ ലഭിക്കുന്നത്. കേരളത്തില്‍ ഇന്നും നാളെയും ശക്തമായ മഴയുണ്ടാകുമെന്നാണ് കാലാവസ്ഥാ വകുപ്പ് നല്‍കുന്ന മുന്നറിയിപ്പ്.