ഓണമെത്തിയിട്ടും അടിയന്തിര ദുരിതാശ്വാസ സഹായം കിട്ടാതെ 37,617 ദുരന്തബാധിത കുടുംബങ്ങള്‍. 90,579 പ്രളയബാധിത കുടുംബങ്ങള്‍ക്കും ഓണത്തിന് മുന്‍പ് 10,000 രൂപ ധനസഹായമെത്തിക്കുമെന്ന് മുഖ്യമന്ത്രി നല്‍കിയ വാക്ക് പാലിക്കാനായില്ല. പട്ടികയിലെ 52,962 കുടുംബങ്ങള്‍ക്കായി 52 കോടി രൂപയാണ് സര്‍ക്കാരിന് വിതരണം ചെയ്യാനായത്.

അര്‍ഹരായ കുടുംബങ്ങളുടെ വിവരങ്ങള്‍ പഞ്ചായത്ത് സെക്രട്ടറിയും വില്ലേജ് ഓഫീസറും പരിശോധിച്ച് വരികയാണെന്നാണ് സര്‍ക്കാര്‍ നല്‍കുന്ന വിശദീകരണം. വില്ലേജ് ഓഫീസര്‍മാരും പഞ്ചായത്ത് സെക്രട്ടറിമാരും ചേര്‍ന്ന് തയ്യാറാക്കിയ പട്ടികയില്‍ ശേഷിക്കുന്ന കുടുംബങ്ങള്‍ക്ക് എന്നത്തേക്ക് സഹായം എത്തിക്കാനാകുമെന്ന് റവന്യൂ-പഞ്ചായത്ത് വകുപ്പുകള്‍ വ്യക്തമാക്കുന്നില്ല. മുഹറം, ഓണം, ശ്രീനാരായണഗുരു ജയന്തി അവധികള്‍ മൂലം സര്‍ക്കാര്‍ ഓഫീസുകള്‍ തുടര്‍ച്ചയായി അടഞ്ഞു കിടക്കുന്നതും സഹായം വിതരണ വൈകിപ്പിക്കുന്നു.