ഫോര്ട്ട് കൊച്ചിയില് ഡ്രെയിനേജ് നിര്മ്മാണത്തില് കൃത്രിമം കാണിച്ച സംഭവത്തില് മേല്നോട്ടത്തില് വീഴ്ച വരുത്തിയ ഉദ്യോഗസ്ഥരെ സസ്പെന്ഡ് ചെയ്യാന് തീരുമാനം.
സംഭവത്തില് പ്രവൃത്തി മേല്നോട്ടത്തില് വീഴ്ച വരുത്തിയ അസിസ്റ്റന്ഡ് എഞ്ചിനിയര്, ഓവര്സിയര് എന്നിവരെ സസ്പെന്ഡ് ചെയ്യുവാന് പൊതുമരാമത്ത് വകുപ്പ് സെക്രട്ടറിക്ക് നിര്ദേശം നല്കിയെന്ന് പൊതുമരാമത്ത് വകുപ്പ് മന്ത്രി പി.എ മുഹമ്മദ് റിയാസ് പറഞ്ഞു.
കരാറുകാരനെ കരിമ്പട്ടികയില് ഉള്പ്പെടുത്താനുള്ള നടപടികള് സ്വീകരിക്കാനുള്ള നിര്ദേശവും നല്കിയിട്ടുണ്ടെന്ന് അദ്ദേഹം കൂട്ടിച്ചേര്ത്തു.
പഴയ കാനയില് കെട്ടികിടക്കുന്ന വെള്ളത്തിലേക്ക് പേരിന് സിമന്റും മെറ്റലും വാരിയിട്ട്് നിര്മ്മാണ പ്രവൃത്തി നടത്തുന്നതിന്റെ ദൃശ്യങ്ങള് സമൂഹമാധ്യമങ്ങളില് പ്രചരിച്ചിരുന്നു. വെള്ളത്തില് സിമന്റിട്ട് പണിക്കാരന് കൈപ്പാണി വെച്ച് തേക്കുന്നതുള്പ്പടെയുള്ള ദൃശ്യങ്ങള് വീഡീയോയിലുണ്ടായിരുന്നു.
മന്ത്രി മുഹമ്മദ് റിയാസ് പറഞ്ഞത്
എറണാകുളം ജില്ലയിലെ ഫോര്ട്ട് കൊച്ചിയില്,ഡ്രെയിനേജ് നിര്മ്മാണത്തിന് കൃത്രിമം കാണിച്ച സംഭവത്തില് പ്രവൃത്തി മേല്നോട്ടത്തില് വീഴ്ച വരുത്തിയ അസിസ്റ്റന്റ്റ് എഞ്ചിനിയര്, ഓവര്സിയര് എന്നിവരെ സസ്പെന്ഡ് ചെയ്യുവാന് പൊതുമരാമത്ത് വകുപ്പ് സെക്രട്ടറിക്ക് നിര്ദ്ദേശം നല്കി.
കരാറുകാരനെ കരിമ്പട്ടികയില്പ്പെടുത്താനുള്ള നടപടികള് സ്വീകരിക്കുവാനും നിര്ദ്ദേശം നല്കിയിട്ടുണ്ട്.