ആസാദ് കശ്മീര് പരാമര്ശത്തില് മുന് മന്ത്രി കെടി ജലീലിനെതിരെ കേസെടുത്ത് പൊലീസ്. പത്തനംതിട്ട കീഴ് വായ്പൂര് പൊലീസാണ് കെടി ജലീലിനെതിരെ കേസെടുത്തത്. ആര്.എസ്.എസ് നേതാവിന്റെ ഹര്ജിയില് തിരുവല്ല ജുഡീഷ്യല് ഒന്നാം മജിസ്ട്രേറ്റ് കോടതി ഇന്നലെ പൊലീസിനോട് കേസെടുക്കാന് നിര്ദേശം നല്കിയിരുന്നു. ഇതിന് പിന്നാലെയാണ് പൊലീസ് നടപടി.
ജലീല് ഭരണഘടനയെ അപമാനിക്കാനും കലാപം ഉണ്ടാക്കാനുമുള്ള ഉദ്ദേശത്തോടെയാണ് ഫേസ്ബുക്ക് പോസ്റ്റ് ഇട്ടതെന്നാണ് എഫ്ഐആറില് പറയുന്നത്.
കശ്മീര് സന്ദര്ശനത്തിന് പിന്നാലെ കെടി ജലീല് ഫേസ്ബുക്കില് എഴുതിയ കുറിപ്പ് വലിയ വിവാദമായിരുന്നു. പാക് അധീന കശ്മീര് എന്ന് ഇന്ത്യ വിശേഷിപ്പിക്കുന്ന കശ്മീരിലെ പ്രദേശത്തെ 'ആസാദ് കശ്മീര് എന്ന് ജലീല് വിശേഷിപ്പിച്ചതായിരുന്നു വിവാദത്തിനടയാക്കിയത്.
ജലീലിന്റെ പരാമര്ശത്തെ മന്ത്രി എം.വി ഗോവിന്ദന് അടക്കമുള്ള ആളുകള് തള്ളിപ്പറഞ്ഞിരുന്നു. ജലീല് പറഞ്ഞത് സി.പി.ഐ.എം നിലപാട് അല്ലെന്നും, പാര്ട്ടിക്ക് ഇതില് കൃചത്യമായ നിലപാട് ഉണ്ടെന്നുമായിരുന്നു മന്ത്രി പറഞ്ഞത്.
വിവാദം കടുത്തതോടെ ജലീല് പോസ്റ്റ് പിന്വിലക്കുകയാണെന്ന് അറിയിച്ചു. അതേസമയം ഡബിള് ഇന്വര്ട്ടഡ് കോമയിലാണ് താന് 'ആസാദ് കശ്മീര്' എന്ന് എഴുതിയത്. അത് മനസിലാകാത്തവരോട് സഹതാപം മാത്രമാണ് ഉള്ളതെന്നും കെ.ടി. ജലീല് വിശദീകരിച്ചിരുന്നു.