ഫെബ്രുവരി എട്ടിന് നടക്കാനിരിക്കുന്ന ഡല്ഹി തിരഞ്ഞെടുപ്പില് ക്യു ആര് കോഡ് അടിസ്ഥാനമാക്കിയുള്ള ഡിജിറ്റല് ഫോട്ടോ വോട്ടര് സ്ലിപ്പ് ഉപയോഗിക്കാന് തീരുമാനം. രാജ്യത്ത് ആദ്യമായാണ് ഈ സംവിധാനം അവതരിപ്പിക്കുന്നത് . നിര്മ്മിതബുദ്ധി സാങ്കേതികവിദ്യ 11 മണ്ഡലങ്ങളില് പരീക്ഷണാടിസ്ഥാനത്തില് നടപ്പാക്കും. മണ്ഡലങ്ങള് പിന്നീട് തീരുമാനിക്കുമെന്ന് തിരഞ്ഞെടുപ്പ് കമ്മീഷന് അറിയിച്ചു.
വോട്ടര് സ്ലിപ്പുമായി ബൂത്തിലെത്തുന്നവരുടെ പേരുവിവരങ്ങള് പട്ടിക നോക്കി കണ്ടെത്തുന്ന രീതിയാണ് ഇതുവരെ നിലനിന്നിരുന്നത്. ഡിജിറ്റല് ഫോട്ടോ വോട്ടര് സ്ലിപ്പ് സംവിധാനം നടപ്പിലാക്കുന്നതുവഴി വിവരങ്ങള് എളുപ്പത്തില് ലഭ്യമാകും. ഫലത്തില് കാലതാമസം ഒഴിവാക്കാനാകും. പ്ലേസ്റ്റോറില് നിന്നും ഡിജിറ്റല് ഫോട്ടോ വോട്ടര് സ്ലിപ്പിന് വേണ്ടിയുള്ള വോട്ടര് ഹെല്പ്ലൈന് ആപ്പ് ഡൗണ്ലോഡ് ചെയ്യാവുന്നതാണ്.
മൊബൈല് നമ്പറും വോട്ടര് ഐഡിയും ആപ്പുമായി ലിങ്കുചെയ്യുന്നതുവഴി ഫോട്ടോ വോട്ടര് സ്ലിപ്പ് സ്വന്തം സ്മാര്ട്ട് ഫോണിലൂടെ വോട്ടര്ക്ക് ലഭിക്കും . ബൂത്തിലെ നിശ്ചിത സ്ഥാനം വരെ വോട്ടര്ക്ക് മൊബൈല് ഫോണ് കൊണ്ടുപോകാം. ക്യു ആര് കോഡ് സ്കാന് ചെയ്തുകഴിഞ്ഞാല് ഫോണ് അധികൃതരെ ഏല്പ്പിക്കണം. പരീക്ഷണം വിജയിച്ചാല് മറ്റുസംസ്ഥാനങ്ങളിലേക്കുകൂടി വ്യാപിക്കാനാണ് തിരഞ്ഞെടുപ്പ് കമ്മീഷന്റെ തീരുമാനം.