നിയമസഭാതെരഞ്ഞെടുപ്പില് പിണറായി വിജയനെതിരെ ധര്മ്മടത്ത് മത്സരിക്കുന്ന വാളയാര് പെണ്കുട്ടികളുടെ അമ്മക്ക് പിന്തുണയുമായി നടന് ജോയ് മാത്യു. വാളയാറിലെ അമ്മയെ യു ഡി എഫ് പിന്തുണക്കും എന്ന് വിശ്വസിക്കാനാണ് ഇഷ്ടമെന്നും, വിജയിക്കാന് വേണ്ടി മാത്രമുള്ളതല്ല മത്സരങ്ങള് ,അവ പൊരുതുവാന് ഉള്ളത് കൂടിയാണ്. ധര്മ്മടത്ത് വോട്ടുണ്ടായിരുന്നെങ്കില് അത് വാളയാറിലെ അമ്മക്ക് തന്നെ;സംശയമില്ലെന്നും ഫേസ്ബുക്ക് പോസ്റ്റില് ജോയ് മാത്യു.
ഏറ്റുമാനൂരില് സീറ്റ് നിഷേധിക്കപ്പെട്ടതില് പ്രതിഷേധിച്ച് തലമൊട്ടയടിച്ച് കോണ്ഗ്രസ് നേതാവ് ലതികാ സുഭാഷിനെയും ജോയ് മാത്യു പരിഹസിക്കുന്നു. ശിരോമുണ്ഡനങ്ങള് പലതുണ്ട് .അധികാരക്കൊതിമൂത്ത് എങ്ങിനെയെങ്കിലും സ്ഥാനാര്ത്ഥിയാകാന് ചിലര് തലതന്നെ വെട്ടി കാഴ്ചവെക്കും .എന്നാല് മറ്റുചിലര് സ്വന്തം കുഞ്ഞുങ്ങളെ പീഡിപ്പിച്ചു കൊന്ന കൊലയാളികളെ സംരക്ഷിക്കാന് ശ്രമിച്ച ഉദ്യോഗസ്ഥരെ രക്ഷിക്കുന്ന ഭരണകൂടത്തിന്റെ നീതിനിഷേധത്തിനെതിരെയുള്ള പോരാട്ടമായും എടുക്കുമെന്നും ജോയ് മാത്യു.
ധര്മ്മാധര്മ്മങ്ങളുടെ ധര്മ്മടം
-----------------------------
നിയമസഭാതെരഞ്ഞെടുപ്പില് ധര്മ്മടം ശ്രദ്ധയാകര്ഷിക്കുന്നത് ദുരധികാരവും നീതിബോധവും തമ്മിലുള്ള പോരാട്ടം എന്ന നിലക്കാണ് . അത് കൊണ്ടാണ് ധര്മ്മടത്തെ പോരാട്ടം കേരളീയ മനസ്സിന്റെ പ്രതിഫലനമായി മാറുന്നത് .ശിരോമുണ്ഡനങ്ങള് പലതുണ്ട് .അധികാരക്കൊതിമൂത്ത് എങ്ങിനെയെങ്കിലും സ്ഥാനാര്ത്ഥിയാകാന് ചിലര് തലതന്നെ വെട്ടി കാഴ്ചവെക്കും .എന്നാല് മറ്റുചിലര് സ്വന്തം കുഞ്ഞുങ്ങളെ പീഡിപ്പിച്ചു കൊന്ന കൊലയാളികളെ സംരക്ഷിക്കാന് ശ്രമിച്ച ഉദ്യോഗസ്ഥരെ രക്ഷിക്കുന്ന ഭരണകൂടത്തിന്റെ നീതിനിഷേധത്തിനെതിരെയുള്ള പോരാട്ടമായും എടുക്കും .അവിടെയാണ് ശിരോമുണ്ഡനങ്ങള് മൂല്യവത്താകുന്നത് . വാളയാറിലെ അമ്മയെ പിന്തുണക്കേണ്ടത് ഓരോ മലയാളിയുടെയും കടമയായി മാറുന്നതും അതുകൊണ്ടാണ് .ഈ പോരാട്ടം ഏറ്റെടുക്കുബോള്
യു ഡി എഫിന്റെ മൂല്യബോധവും ധാര്മ്മികമായ ഉത്തരവാദിത്വവും ഞങ്ങള് ഉയര്ത്തിപ്പിടിക്കുന്നു എന്ന പ്രതീകാത്മകമായ നിലപാടാണു വ്യക്തമാകുന്നത് .വാളയാറിലെ അമ്മയെ യു ഡി എഫ് പിന്തുണക്കും എന്ന് വിശ്വസിക്കാനാണ് എനിക്കിഷ്ടം . വിജയിക്കാന് വേണ്ടി മാത്രമുള്ളതല്ല മത്സരങ്ങള് ,അവ പൊരുതുവാന് ഉള്ളത്കൂടിയാണ് . ധര്മ്മടത്ത് എനിക്ക് വോട്ടുണ്ടായിരുന്നെങ്കില് അത് വാളയാറിലെ അമ്മക്ക് തന്നെ;സംശയമില്ല .