നടിയെ ആക്രമിച്ച കേസിലെ സാക്ഷി വിസ്താരത്തില് ഇടപെടില്ലെന്ന് സുപ്രീംകോടതി. സാക്ഷി വിസ്താരത്തിന്റെ കാര്യത്തില് വിചാരണ കോടതിയാണ് തീരുമാനമെടുക്കേണ്ടതെന്ന് സുപ്രീം കോടതി വ്യക്തമാക്കി. മഞ്ജുവാര്യര് ഉള്പ്പെടെയുള്ള സാക്ഷികളെ വീണ്ടും വിസ്തരിക്കുന്നതിന് എതിരെ കേസിലെ പ്രതിയായ ദിലീപ് നല്കിയ ഹര്ജിയിലാണ് കോടതി നടപടി.
ജസ്റ്റിസ് ജെ.കെ മഹേശ്വരി അദ്ധ്യക്ഷനായ ബെഞ്ചാണ് ഹര്ജി പരിഗണിച്ചത്. സാക്ഷി വിസ്താരം അടക്കമുള്ള കാര്യങ്ങളില് സുപ്രീംകോടതി ഇടപെടില്ലെന്ന് വ്യക്തമാക്കി. കേസുമായി ബന്ധപ്പെട്ട് സാക്ഷി വിസ്താരം എത്രയും വേഗം പൂര്ത്തിയാക്കണമെന്നും സുപ്രീംകോടതി. ഹര്ജികള് അടുത്ത മാസം 24ന് വീണ്ടും പരിഗണിക്കും.
മഞ്ജു വാര്യരെ വീണ്ടും വിസ്തരിക്കണമെന്ന് പ്രോസിക്യൂഷന് നേരത്തെ കോടതിയെ അറിയിച്ചിരുന്നു. ഏഴ് പേരെയാണ് വീണ്ടും വിസ്തരിക്കുന്നതെന്നും ഇതില് മൂന്നു പേരുടെ വിസ്താരം പൂര്ത്തിയായതായും പ്രോസിക്യൂഷന് അറിയിച്ചു. നാല് പേരെയാണ് കേസില് ഇനി വീണ്ടും വിസ്തരിക്കാനുള്ളത്.
പ്രധാന സാക്ഷികളെ വിസ്തരിക്കണമെന്നായിരുന്നു സംസ്ഥാന സര്ക്കാര് കഴിഞ്ഞ ദിവസം കോടതിയെ അറിയിച്ചത്. വിചാരണ നീട്ടിക്കൊണ്ടുപോകാന് ശ്രമിക്കുന്നത് പ്രതിഭാഗമാണെന്നും സര്ക്കാര് നല്കിയ സത്യവാങ്മൂലത്തില് വ്യക്തമാക്കിയിരുന്നു.