അട്ടപ്പാടിയില്‍ വീണ്ടും ശിശുമരണം. അഗളി പഞ്ചായത്തിലെ കതിരംപതി ആദിവാസി ഊരിലെ പത്ത് മാസം പ്രായമുള്ള കുഞ്ഞാണ് അല്‍പസമയം മുമ്പ് കോട്ടത്തറ ട്രൈബല്‍ സ്‌പെഷ്യാലിറ്റി ആശുപത്രിയില്‍ മരിച്ചത്.

അയ്യപ്പന്റെയും രമ്യയുടെയും മകള്‍ അസന്യയാണ് മരിച്ചത്. ഹൃദയസംബന്ധമായ അസുഖത്തിന് ചികിത്സയിലായിരുന്ന അസന്യയെ കഴിഞ്ഞ ദിവസം വൈകീട്ട് ആശുപത്രിയിലേക്ക് കൊണ്ടു പോകുംവഴിയാണ് മരിച്ചത്.

കഴിഞ്ഞ ദിവസം രാവിലെ അട്ടപ്പാടിയില്‍ ഒരു ശിശുമരണം റിപ്പോര്‍ട്ട് ചെയ്തിരുന്നു. മണിക്കൂറുകളുടെ വ്യത്യാസത്തിലാണ് വീണ്ടും മരണം സംഭവിച്ചിരിക്കുന്നത്.

വീട്ടിയൂര്‍ ഊരിലെ ഗീതു-സുനീഷ് ദമ്പതികളുടെ മൂന്ന് ദിവസം പ്രായമായ കുഞ്ഞാണ് രാവിലെ മരിച്ചത്. നാല് ദിവസത്തിനിടെ വ്യത്യസ്ത പ്രായക്കാരായ നാല് കുട്ടികളാണ് അട്ടപ്പാടിയില്‍ മരിച്ചത്.

ഈ വര്‍ഷം എട്ട് ശിശുമരണങ്ങളാണ് ഇതുവരെ അട്ടപ്പാടിയില്‍ നടന്നതെന്നാണ് റിപ്പോര്‍ട്ടുകള്‍.