നടിയെ ആക്രമിച്ച കേസില് വിചാരണ പൂര്ത്തിയാക്കാന് കൂടുതല് സമയം അനുവദിച്ച് സുപ്രിംകോടതി. ജനുവരി 31നകം വിചാരണ കഴിവതും പൂര്ത്തിയാക്കാനാണ് കോടതി നിര്ദേശം.
കേസില് വിചാരണ പൂര്ത്തിയാക്കാന് കൂടുതല് സമയം വേണമെന്ന് ആവശ്യപ്പെട്ട് വിചാരണ കോടതി ജഡ്ജി ഹണി.എം വര്ഗീസ് നല്കിയ ഹര്ജിയിലാണ് സുപ്രിംകോടതി ഉത്തരവ്.
ജസ്റ്റിസ് ദിനേശ് മഹേശ്വരി അധ്യക്ഷനായ ബെഞ്ചാണ് ഹര്ജി പരിഗണിച്ചത്.
വിചാരണ പൂര്ത്തിയാക്കാന് എല്ലാ കക്ഷികളും സഹകരിക്കണമെന്നും കോടതി ആവശ്യപ്പെട്ടു. കേസിന്റെ വാദം കേള്ക്കലിനിടെ നടിക്ക് വേണ്ടിയും സംസ്ഥാന സര്ക്കാരിന് വേണ്ടിയും ഹാജരായ അഭിഭാഷകര് വിചാരണ കോടതി ജഡ്ജിയുമായി ബന്ധപ്പെട്ട ആരോപണങ്ങള് സുപ്രിംകോടതിയുടെ ശ്രദ്ധയില്പ്പെടുത്തി.
വിചാരണ നടപടിയുടെ പുരോഗതി റിപ്പോര്ട്ട് നാലാഴ്ചയ്ക്കുള്ളില് സമര്പ്പിക്കാന് ജസ്റ്റിസ് ഹണി എം വര്ഗീസിന് സുപ്രിംകോടതി നിര്ദേശം നല്കി.
വിചാരണ കോടതി മാറ്റണമെന്ന് ആവശ്യപ്പെട്ട് താന് ഹൈക്കോടതിയെ സമീപിച്ചിട്ടുണ്ടെന്നും ഈ കേസ് ബുധനാഴ്ച കോടതി പരിഗണിക്കുമെന്നും അക്രമത്തിന് ഇരയായ നടി സുപ്രിംകോടതിയെ അറിയിച്ചു.