കഴിഞ്ഞദിവസം പ്രധാനമന്ത്രി അനാച്ഛാദനം ചെയ്ത അശോകസ്തംഭം വിവാദമായതിന് പിന്നാലെ പ്രതികരണവുമായി ബോളിവുഡ് നടന് അനുപം ഖേര്. ഇത് സ്വതന്ത്ര ഭാരതത്തിന്റെ സിംഹമാണെന്നും ചിലപ്പോള് പല്ല് കാണിക്കും, വേണ്ടിവന്നാല് കടിച്ചെന്നും വരും എന്നാണ് അനുപം ഖേര് ട്വീറ്റ് ചെയ്തത്.
'സിംഹമായാല് ചിലപ്പോള് പല്ല് കാണിച്ചെന്നുവരും. എല്ലാത്തിനും ഉപരി, ഇത് സ്വതന്ത്ര ഭാരതത്തിന്റെ സിംഹമാണ്. വേണ്ടിവന്നാല് സിംഹം കടിച്ചുവെന്നും വരും. ജയ് ഹിന്ദ്,' എന്ന് അനുപം ഖേര് ട്വിറ്റര് പോസ്റ്റിലൂടെ പറഞ്ഞു. പ്രധാന മന്ത്രി മ്യൂസിയത്തില് നിന്നെടുത്ത വിഡിയോയ്ക്കൊപ്പം ആണ് ട്വീറ്റ്.
പുതിയ പാര്ലമെന്റ് സമുച്ചയത്തിന് മുകളില് സ്ഥാപിച്ച അശോകസ്തംഭം വലിയ ചര്ച്ചയായിരുന്നു. സിംഹങ്ങളുടെ പല്ലുകള് പുറത്തുകാണുന്ന വിധത്തിലാണ് പുതിയ അശോകസ്തംഭത്തിന്റെ രൂപകല്പ്പന. ദേശീയ ചിഹ്നത്തിലെ സിംഹങ്ങള്ക്ക് സൗമ്യഭാവമാണ് ഉള്ളത് എന്നാല് പുതിയ ചിന്ഹത്തില് സിംഹങ്ങള്ക്ക് നരഭോജികളുടെ രൂപമാണുള്ളതെന്ന് ആര്.ജെ.ഡി ട്വീറ്റ് ചെയ്തിരുന്നു.
പ്രധാനമന്ത്രി ദേശീയ ചിഹ്നം അനാച്ഛാദനം ചെയ്തത് വഴി ഭരണഘടന ലംഘനമാണ് നടത്തിയതെന്ന് സി.പി.ഐ.എം വിമര്ശിച്ചിരുന്നു. ഇതിനെതിരെ സി.പി.ഐ.എം പൊളിറ്റ്ബ്യൂറോ പ്രസ്താവനയും ഇറക്കിയിരുന്നു. തൃണമൂല് കോണ്ഗ്രസ് നേതാവ് മഹുവ മൊയ്ത്ര ട്വിറ്ററില് പഴയ അശോക സ്തംഭത്തിന്റെയും പുതിയതിന്റെയും ചിത്രം പങ്കുവെച്ചിരുന്നു. പ്രശാന്ത് ഭൂഷണും പ്രധാനമന്ത്രി അനാച്ഛാദനം ചെയ്ത അശോക സ്തംഭത്തിനെതിരെ വിമര്ശനം ഉന്നയിച്ച് രംഗത്തെത്തി. ഇതിനിടയിലാണ് അനുപം ഖേറിന്റെ ട്വീറ്റ്.