നാട്ടിൽ നടക്കുന്ന കാര്യങ്ങൾ ജനങ്ങളെ അറിയിക്കുക എന്നതു മാധ്യമങ്ങളുടെ ​ജോലിയാണ്​. അതിൽ പലതും പലരും ഒളിച്ചുവെക്കാൻ ആഗ്രഹിക്കുന്ന വിവരങ്ങൾ ആയിരിക്കും. പല സംഭവങ്ങളുടെയും ഗതിതന്നെ മാറ്റിക്കളയുന്നതും ഇങ്ങനെ പുറത്തുവരുന്ന വിവരങ്ങൾ ആയിരിക്കും. ഒരു വിഷയത്തിന്‍റെ ഇനിയും പുറത്തുവരാത്ത തലങ്ങൾ ജനങ്ങളിലേക്ക്​ എത്തിക്കുന്നതാണു മാധ്യമങ്ങളുടെ വിജയവും. ലോകമെങ്ങും മാധ്യമങ്ങൾ ശ്രമിക്കുന്നത്​ അതിനുവേണ്ടിയാണ്​. സ്വേച്ഛാധിപത്യ ഭരണകൂടങ്ങൾ മറച്ചുവെക്കാൻ ശ്രമിക്കുന്ന കാര്യങ്ങൾ പോലും മാധ്യമങ്ങൾ പല രൂപങ്ങളിൽ പുറത്തുകൊണ്ടുവരുന്ന കാലത്താണ്​ ജനാധിപത്യ സംവിധാനങ്ങൾ ഏറ്റവും ശക്​തമായി നിലനിൽക്കുന്നു എന്നു നാമേവരും ഊറ്റംകൊള്ളുന്ന കേരളത്തിൽ ഒരു മാധ്യമ ​സ്ഥാപനത്തിനും അതിന്‍റെ അമരക്കാരനും എതിരെ പൊലീസ്​ സ്വമേധയാ കേസെടുത്ത വിവരം പുറത്തുവരുന്നത്​.

നടിയെ ആക്രമിച്ച കേസുമായി ബന്ധപ്പെട്ട വാർത്തകളുടെ പേരിൽ റിപ്പോർട്ടർ ചാനലിനും ചീഫ്​ എഡിറ്റർ എം.വി നികേഷ്​ കുമാറിനുമെതിരെ കേസെടുത്ത പൊലീസ്​ നടപടി അങ്ങേയറ്റം അപലപനീയമാണ്​. വാർത്തകളു​ടെ പേരിൽ മാധ്യമങ്ങൾക്കും മാധ്യമ പ്രവർത്തകർക്കുമെതിരെ കേസെടുക്കുന്നത്​ ജനാധിപത്യ വ്യവസ്ഥയ്ക്ക്​ നിരക്കുന്ന പ്രവൃത്തിയല്ല. അറിയാനുള്ള ജനങ്ങളുടെ അവകാശത്തിനും അറിയിക്കാനുള്ള മാധ്യമങ്ങളുടെ അവകാശത്തിനും നേരെയുള്ള കടന്നാക്രമണമാണിത്​. മാധ്യമ സ്വാതന്ത്ര്യത്തിനും ജനാധിപത്യാവകാശങ്ങൾക്കും നേരെയുള്ള വെല്ലുവിളി. കേരളത്തിലെ ഏറ്റവും മുതിർന്ന ദൃശ്യമാധ്യമ പ്രവർത്തകരിലൊരാളായ നികേഷ്​ കുമാറിനെതിരെ കേസെടുത്തത്​ ഉന്നത തലത്തിൽ അറിയാതെയാണ്​ എന്നു വിശ്വസിക്കുക പ്രയാസമാണ്​. അറിഞ്ഞില്ലെങ്കിൽ അതു പൊലീസ്​ സംവിധാനത്തിന്‍റെയും നിയമപാലന നടപടിക്രമങ്ങളുടെയും അക്ഷന്തവ്യമായ വീഴ്ചയാണ്​. അപ്പോഴും ഉത്തരവാദിത്തത്തിൽനിന്ന്​ അധികാരികൾക്ക്​ ഒഴിഞ്ഞുമാറാൻ കഴിയില്ല. വിചാരണ കോടതിയുടെ പരിഗണനയിൽ ഇരിക്കുന്ന വിഷയം പ്രസ്തുത കോടതിയുടെ അനുമതിയില്ലാതെ ​പ്രസിദ്ധീകരിച്ചാൽ ​കേസെടുക്കാനുള്ള ഐ.പി.സി സെക്​ഷൻ 228 എ(3) അടക്കമുള്ള വകുപ്പുകൾ പ്രകാരമാണ്​ റിപ്പോർട്ടറിനെതിരെ കേസെടുത്തിരിക്കുന്നത്​.

അ​ന്വേഷണ ഉദ്യോഗസ്ഥരെ അപായപ്പെടുത്താൻ ദിലീപും സംഘവും ഗൂഢാലോചന നടത്തിയെന്ന നിർണായക വിവരം പുറത്തുവിട്ട സംവിധായകൻ ബാലചന്ദ്രകുമാറുമായുള്ള അഭിമുഖം അടക്കമുള്ള റിപ്പോർട്ടുകൾ കേസിന്​ ആധാരമായിട്ടുണ്ടെന്നാണു മനസ്സിലാവുന്നത്​. വിചാരണ നടക്കുന്ന കേസിൽ നിലവിൽ ഒരു നിലയ്ക്കും ബന്ധമില്ലാതിരുന്ന ഒരാളുമായുള്ള അഭിമുഖം എങ്ങനെയാണ്​ ഈ വകുപ്പിന്‍റെ പരിധിയിൽ വരിക. അതും പരാതിക്കാരില്ലാതെ സ്വമേധയാ കേസ്​ എടുത്തിരിക്കുന്നു എന്നു പറയുമ്പോൾ പൊലീസ്​ സ്വയം തങ്ങളെത്തന്നെയാണു തള്ളിപ്പറയുന്നത്​; അല്ലെങ്കിൽ പ്രതിക്കുട്ടിൽ നിർത്തുന്നത്​. ബാലചന്ദ്രകുമാറിന്‍റെ വെളിപ്പെടുത്തലാണ്​ അന്വേഷണ ഉദ്യോഗസ്ഥർക്കെതിരെ ദിലീപ്​ വധ ഗൂഢാലോചന നടത്തി എന്ന കേസിന്‍റെ അടിസ്​ഥാനം എന്നതുപോലും മറന്നുകൊണ്ടുള്ളതാണു പൊലീസ്​ നടപടി. വാർത്താശേഖരണത്തിനു പോകുന്ന മാധ്യമ പ്രവർത്തകരെ അന്യായമായി തടങ്കലിലാക്കുകയും രാഷ്ട്രീയ നേട്ടത്തിനായി രാജ്യ​ദ്രോഹക്കുറ്റം ചുമത്തി പീഡിപ്പിക്കുകയും ചെയ്യുന്ന ഉത്തരേന്ത്യൻ മാതൃകയിൽനിന്നു വ്യത്യസ്തമല്ല ഈ സംഭവവും. ജനാധിപത്യ മൂല്യങ്ങളിൽ വിശ്വസിക്കുന്ന എല്ലാവരും ഇതിനെതിരെ രംഗത്തുവരേണ്ടതുണ്ട്​.