ദുബായ് സമ്മർ സർപ്രൈസിന്റെ 26 മത് പതിപ്പ് സമാപിച്ചു. 67 ദിവസത്തെ വിനോദ പരിപാടികള്ക്ക് ശേഷമാണ് ഡിഎസ്എസിന് സമാപനമായത്. വേനല്ക്കാലത്ത് ദുബായിലെത്തുന്ന സന്ദർശകർക്കും ഒപ്പം താമസക്കാർക്കും മികച്ച അനുഭവം നല്കിയാണ് ഡിഎസ്എസ് സമാപിച്ചതെന്ന് ഡിഎസ്എസ് സംഘാടകരായ ദുബായ് ഫെസ്റ്റിവൽസ് ആൻഡ് റീട്ടെയിൽ എസ്റ്റാബ്ലിഷ്മെന്റ് സിഇഒ അഹമ്മദ് അൽ ഖാജ പറഞ്ഞു. ഡിഎസ് എസിന്റെ ഭാഗമായി നിരവധി ഓഫറുകളും തല്സമയപരിപാടികളുമെല്ലാം സംഘടിപ്പിച്ചിരുന്നു.
സ്വകാര്യമേഖലയുമായി സഹകരിച്ചാണ് ഡിഎസ്എസ് നടപ്പിലാക്കിയത്. നിരവധി വിനോദപരിപാടികളും സംഗീതകച്ചേരികളും കുട്ടികള്ക്കായുളള പരിപാടികളും ഇത്തവണ ഒരുക്കിയിരുന്നു. പ്രശസ്ത ഗായകരായ ഹുസൈൻ അൽ ജാസ്മി, കാദിം അൽ സാഹിർ, മുഹമ്മദ് അബ്ദോ തുടങ്ങിയവരുടെ സംഗീതപരിപാടിയ്ക്ക് മികച്ച പ്രതികരണമാണ് ലഭിച്ചത്.
3500 റീടെയ്ല് ഷോപ്പുകളും 1000ലധികം ബ്രാന്ഡുകളും ഡിഎസ്എസിന്റെ ഭാഗമായി. റാഫിള് നറുക്കെടുപ്പിലൂടെ നിരവധി ഭാഗ്യശാലികള്ക്ക് സമ്മാനങ്ങളും ലഭിച്ചു. മോദേഷും ഡാനയും കുട്ടികള്ക്കായി നടത്തിയ പരിപാടികളില് വലിയ പങ്കാളിത്തമാണ് ലഭിച്ചത്.