യുഎഇ യുടെ അമ്പത്തിനാലാമത് ദേശീയ ദിനാഘോഷത്തിന്‍റെ ഭാഗമായി നടക്കുന്ന കേരളോത്സവത്തിലെ സാംസ്കാരികസമ്മേളനം മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. ഡിസംബർ 1, 2 തിയതികളില്‍ ദുബായ് അമിറ്റി സ്കൂള്‍ ഗ്രൗണ്ടിലാണ് കേരളോത്സവം നടക്കുന്നത്. ഡിസംബർ ഒന്നിന് വൈകീട്ട് 6.30 ന് നടക്കുന്ന സാംസ്കാരിക സമ്മേളനം മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. ഇന്ത്യൻ കോൺസുലേറ്റ് പ്രതിനിധികളും സാമൂഹിക സാംസ്കാരിക ബിസിനസ് രംഗത്തുളളവരും സമ്മേളനത്തില്‍ സംബന്ധിക്കും.
ഓർമ വാദ്യസംഘം അവതരിപ്പിക്കുന്ന മേളവും 500 ഓളം വനിതകൾ അണിനിരക്കുന്ന മെഗാ തിരുവാതിരയും യുവ ഗായകർ അണിനിരക്കുന്ന മസാല കോഫി ബാൻഡ്ന്‍റെ സംഗീത പരിപാടി ആദ്യ ദിവസവും വിധു പ്രതാപും രമ്യ നമ്പീശനും പങ്കെടുക്കുന്ന സംഗീത നിശ ,രാജേഷ് ചേർത്തല യുടെ വാദ്യ മേള ഫ്യൂഷൻ എന്നിവ രണ്ടാം ദിവസവും നടക്കും. നൂറോളം വർണ്ണക്കുടകൾ ഉൾപ്പെടുത്തിയുള്ള കുടമാറ്റവും ആനയും ആനച്ചമയവും ഇത്തവണയുണ്ടാകും. തെരുവുനാടകങ്ങൾ, തിരുവാതിര, ഒപ്പന ,മാർഗംകളി, കോൽക്കളി, പൂരക്കളി സംഗീത ശില്പം ,സൈക്കിൾ യജ്ഞം തുടങ്ങിയ നിരവധി നാടൻ കലാരൂപങ്ങളും കേരളത്തിന്‍റെ തനത് നാടൻ രുചി വിഭവങ്ങളുമായി വിവിധ ഭക്ഷണ ശാലകൾ ,തട്ടുകടകൾ തുടങ്ങിയ മലയാളത്തിന്‍റെ തനിമയെയും സംസ്കൃതിയെയും ഇഴ ചേർത്ത് ഒരുക്കുന്ന കേരളോത്സവം പ്രവാസത്തിലെ പുതുതലമുറയ്ക്ക് പരിചയപ്പെടുത്തി ഒരു വ്യത്യസ്ത അനുഭവമാക്കി മാറ്റുകയാണ് സംഘാടകരുടെ ലക്ഷ്യം.
ഉത്സവ നഗരിയിലെ സാഹിത്യ സദസ്സിനോട് അനുബന്ധിച്ച് എഴുത്തുകാരും വായനക്കാരും ചേർന്ന് നടത്തുന്ന സംവാദങ്ങൾ, പുസ്തകശാല, കവിയരങ്ങ്, പ്രശ്നോത്തരികൾ യുഎഇ യിലെ പ്രശസ്ത ചിത്രകാരന്മാരുടെ തൽസമയ പെയിന്റിങ്ങും കേരളത്തിന്‍റെ ചരിത്രവും പോരാട്ടത്തിന്‍റെ നാൾവഴികളും ഉൾക്കൊള്ളുന്ന ചരിത്ര പുരാവസ്തു പ്രദർശനങ്ങളും സദസ്യർക്കും പുതുതലമുറക്കും പുത്തൻ അനുഭവങ്ങൾ പകർന്നു നൽകും. ദുബായിലെ മലയാളം മിഷനിലൂടെ അക്ഷരം പഠിക്കുന്ന കുട്ടികൾക്ക് അവരുടെ സർഗ്ഗവാസനകൾ പ്രദർശിപ്പിക്കാനുള്ള അവസരവും, പുതുതായി മലയാളം മിഷനിൽ ചേരാൻ ആഗ്രഹിക്കുന്ന കുട്ടികൾക്കുള്ള രജിസ്ട്രേഷൻ സൗകര്യവും , പ്രവാസികൾക്കായുള്ള സർക്കാർ പദ്ധതികളെ അടുത്തറിയാനും പങ്കാളികളാകാനുമായി നോർക്ക,പ്രവാസി ക്ഷേമനിധി,നോർക്ക കെയർ ഇൻഷുറൻസ്‌ തുടങ്ങിയ പദ്ധതികളുടെ പ്രത്യേക സ്റ്റാളുകളും ഉത്സവപ്പറമ്പിൽ ഒരുക്കുമെന്ന് സംഘാടകർ അറിയിച്ചു.
കെ എസ് എഫ് ഇ സ്റ്റാളും ഉണ്ടായിരിക്കും. കേരളോത്സവത്തിലേക്കുളള പ്രവേശനം സൗജന്യമാണ്. പ്രവാസി ക്ഷേമനിധി ഡയറക്ടർ ബോർഡ് മെമ്പർ എൻ കെ കുഞ്ഞഹമ്മദ്, ഓർമ്മ ജനറൽ സെക്രട്ടറി ഷിജു ബഷീർ, ഓർമ്മ പ്രസിഡന്‍റ് ഡോ .നൗഫൽ പട്ടാമ്പി,കേരളോത്സവം ജനറൽ കൺവീനർ അനീഷ് മണ്ണാർക്കാട്, കേരളോത്സവം ഓർമ്മ & ജോയിന്‍റ് കൺവീനർ വൈസ് പ്രസിഡന്‍റ് ജിജിത അനിൽകുമാർ, കേരളോത്സവം വൈസ് ചെയർമാന്‍ റിയാസ് സി കെ, സെക്രട്ടറി ഓർമ്മ & കൺവീനർ അഡ്വെർടൈസ്‌മെന്‍റ് അംബുജാക്ഷൻ എന്നിവർ വാർത്താസമ്മേളത്തില്‍ സംബന്ധിച്ചു.
