ഗൾഫ് സന്ദർശനത്തിന്‍റെ ഭാഗമായി കേരള മുഖ്യമന്ത്രി പിണറായി വിജയൻ ദുബായിലെത്തുന്നു. ഡിസംബർ 1 തിങ്കൾ വൈകിട്ട് 6 മണിക്ക് ദുബായ് അമിറ്റി സ്‌കൂളിൽ നടക്കുന്ന കേരളോത്സവത്തിന്‍റെ സാംസ്കാരിക സമ്മേളനത്തിലാണ് മുഖ്യമന്ത്രി മലയാളി സമൂഹത്തെ അഭിസംബോധന ചെയ്യുക.സാംസ്കാരിക മന്ത്രി സജി ചെറിയാൻ, ഇന്ത്യൻ അംബാസഡർ, ദുബായ് കോൺസുൽ ജനറൽ, കേരള ചീഫ് സെക്രെട്ടറി, ഡോ. എം എ യൂസഫലി, ഡോ. ആസാദ് മൂപ്പൻ,ഡോ കെ പി ഹുസൈൻ, പ്രവാസി ക്ഷേമനിധി ബോർഡ് ഡയറക്ടർ എൻ കെ കുഞ്ഞഹമ്മദ്, നോർക്ക ഡയറക്ടർ ഓ വി മുസ്തഫ, എന്നിവരും പരിപാടിയിൽ പങ്കെടുക്കും.
ദുബായിക്കു പുറമേ, മറ്റു വടക്കൻ എമിറേറ്റുകളിലെയും മലയാളി സാമൂഹിക-സാംസ്കാരിക സംഘടനകളുടെ ഭാരവാഹികളും പ്രതിനിധികളും വ്യവസായരംഗത്തുളളവരും പരിപാടിയില്‍ സംബന്ധിക്കും. വിവിധ സംഘടനകളുടെ നേതൃത്വത്തില്‍ മറ്റ് എമിറേറ്റുകളിൽ നിന്ന് യാത്ര സൗകര്യമൊരുക്കിയിട്ടുണ്ട്. വിവിധ മേഖലകളിൽ നിന്നുള്ള പ്രതിനിധികൾ, വ്യവസായികൾ എന്നിവർക്ക് മുഖ്യമന്ത്രിയുമായി കൂടിക്കാഴ്ച നടത്താനുള്ള അവസരമൊരുക്കുന്നതു സംബന്ധിച്ച് സംഘാടക സമിതി കൂടിയാലോചനകൾ നടത്തിവരികയാണെന്നും സംഘാടകർ പറഞ്ഞു.
പ്രവാസി ക്ഷേമ ബോർഡ് ഡയറക്ടർ, ജനറൽ കൺവീനർ എൻ കെ കുഞ്ഞഹമ്മദ്, സ്വാഗത സംഘം ചെയർമാൻ ഡോ :കെ പി ഹുസൈൻ, ഇന്ത്യൻ അസോസിയേഷൻ ജനറൽ സെക്രട്ടറി ശ്രീപ്രകാശ്, ലോകകേരള സഭ അംഗം ടി കെ അബ്ദുൽ ഹമീദ്, മലയാളം മിഷൻ യു ഏ ഇ കോർഡിനേറ്റർ കെ എൽ ഗോപി, ഓർമ ജനറൽ സെക്രട്ടറി ഷിജു ബഷീർ,ഐ എം സി സി ഷാർജ പ്രസിഡന്‍റ് താഹിർ അലി എന്നിവർ വാർത്താ സമ്മേളനത്തിൽ പങ്കെടുത്തു.
