വിനീത് ശ്രീനിവാസന്‍റെ കൈപിടിച്ച് മലര്‍വാടി ആര്‍ട്സ് ക്ലബ്ബ്' എന്ന ചിത്രത്തിലൂടെ മലയാള സിനിമാ ലോകത്തേക്കെത്തിയ രണ്ട് പേർ സിനിമയിൽ ഇപ്പോൾ പതിനഞ്ച് വർഷം പൂർത്തിയാക്കുകയാണ്. ഒരു ചിത്രത്തിലൂടെ ഒരുമിച്ചെത്തി പിന്നീട് പല ചിത്രങ്ങളിലൂടെ പ്രേക്ഷകരുടെ പ്രിയപ്പെട്ട കോംമ്പോ ആയി മാറിയ നിവിൻ പോളി അജു വർഗീസും വീണ്ടും ഒന്നിക്കുകയാണ്. അഖിൽ സത്യൻ സംവിധാനം ചെയ്ത് ഇരുവരും ഒന്നിച്ചെത്തുന്ന സർവ്വം മായയുടെ പുതിയ പോസ്റ്റർ അണിയറ പ്രവർത്തകർ ഇപ്പോൾ പുറത്തു വിട്ടിട്ടുണ്ട്. മലർവാടി ആർട്സ് ക്ലബ്ബ്, തട്ടത്തിൻ മറയത്ത്, നേരം, ഓം ശാന്തി ഓശാന, ഒരു വടക്കൻ സെൽഫി, ജേക്കബിന്‍റെ സ്വർഗ്ഗരാജ്യം, ഹേ ജൂഡ്, ലവ് ആക്ഷൻ ഡ്രാമ, സാറ്റർഡേ നൈറ്റ് തുടങ്ങി ഇരുവരും ഒരുമിച്ചെത്തിയ ഒട്ടുമിക്ക ചിത്രങ്ങളും പ്രേക്ഷകർക്ക് സമ്മാനിച്ചത് ടോട്ടൽ ഫൺ ഫാമിലി എന്‍റർടെയ്നർ സിനിമകളായിരുന്നു. ഇരുവരുടേയും ഓൺ സ്ക്രീൻ കെമിസ്ട്രിക്ക് അന്നും ഇന്നും ഒട്ടേറെ ആരാധകരുണ്ട്. ഏത് പ്രായത്തിലുള്ളവരേയും പിടിച്ചിരുത്തുന്ന അസാധ്യ അഭിനയ മികവ് രണ്ടുപേർക്കും കൈമുതലായുണ്ട്.
'മലർവാടി'യിൽ തുടങ്ങിയ കൂട്ടുകെട്ട് പിന്നീടുവന്ന ചിത്രങ്ങളിലൊക്കെയും തുടർന്നപ്പോള്‍ പ്രേക്ഷകർ നിവിനേയും അജുവിനേയും നെഞ്ചിലേറ്റുകയായിരുന്നു. 'തട്ടിൻ മറയത്തി'ലെ വിനോദും അബുവും യുവത്വത്തിന്‍റെ ഹരമായി മാറി. 'ഓം ശാന്തി ഓശാന'യിലെ പ്രസാദ് വർക്കിയും ഡേവിഡ് കാഞ്ഞാണിയും, 'ഒരു വടക്കൻ സെൽഫി'യിലെ ഉമേഷും ഷാജിയും, 'ലവ് ആക്ഷൻ ഡ്രാമ'യിലെ ദിനേശനും വസിഷ്ട്ടും തുടങ്ങി നിരവധി കഥാപാത്രങ്ങളെ ഈ കോമ്പോ പ്രേക്ഷകർക്ക് സമ്മാനിച്ചിട്ടുണ്ട്. വീണ്ടും മൂന്ന് വർഷങ്ങൾക്ക് ശേഷം ഇരുവരും ഒരുമിച്ചെത്തുകയാണ്. പുതിയ കാലത്തിന്‍റെ മാറ്റങ്ങള്‍ക്കൊപ്പം പുത്തൻ ലുക്കിൽ ഈ കൂട്ടുകെട്ട് വീണ്ടും ഒന്നിച്ചെത്തുമ്പോള്‍ പ്രതീക്ഷയേറെയാണ്.
ഫഹദ് ഫാസിൽ നായകനായി എത്തിയ 'പാച്ചുവും അത്ഭുത വിളക്കും' എന്ന ചിത്രത്തിന് ശേഷം അഖിൽ സത്യൻ കഥയെഴുതി സംവിധാനം ചെയ്യുന്ന 'സർവ്വം മായ' ഫാന്‍റസി കോമഡി ജോണറിലാണ് എത്തുന്നത് എന്നതിനാൽ തന്നെ കൗതുകത്തോടെയാണ് ഏവരും ഉറ്റുനോക്കുന്നത്. സംവിധായകൻ സത്യൻ അന്തിക്കാടിന്‍റെ മകൻ അഖിൽ സത്യനോടൊപ്പം ഇതാദ്യമായി നിവിൻ പോളിയും അജു വർഗ്ഗീസും ഒന്നിക്കുന്നുവെന്ന പ്രത്യേകതയുമുണ്ട്. ഇവരെ കൂടാതെ ജനാർദ്ദനൻ, രഘുനാഥ് പലേരി, മധു വാര്യർ, അൽത്താഫ് സലീം, പ്രീതി മുകുന്ദൻ തുടങ്ങി വലിയൊരു താരനിര തന്നെ ചിത്രത്തിലുണ്ട്. ഫയർ ഫ്ലൈ ഫിലിംസിന്‍റെ ബാനറിൽ അജയ്യ കുമാർ, രാജീവ് മേനോൻ എന്നിവർ ചേർന്നാണ് ചിത്രം നിർമ്മിക്കുന്നത്.
സംഗീതം: ജസ്റ്റിൻ പ്രഭാകരൻ, ഛായാഗ്രഹണം: ശരൺ വേലായുധൻ, എഡിറ്റർ: അഖിൽ സത്യൻ, സിങ്ക് സൗണ്ട്: അനിൽ രാധാകൃഷ്ണൻ, എക്സി.പ്രൊഡ്യൂസർ: ബിജു തോമസ്, പ്രൊഡക്ഷൻ ഡിസൈൻ: രാജീവൻ, കലാസംവിധാനം: അജി കുറ്റിയാണി, കോസ്റ്റ്യൂം: സമീറ സനീഷ്, മേക്കപ്പ്: സജീവ് സജി, സ്റ്റിൽസ്: രോഹിത് കെ.എസ്, ലൈൻ പ്രൊഡ്യൂസർ: വിനോദ് ശേഖർ, സഹ സംവിധാനം: ആരൺ മാത്യു, അസോസിയേറ്റ് ഡയറക്ടർ: വന്ദന സൂര്യ, ഡിസൈൻസ്: ഏസ്തറ്റിക് കുഞ്ഞമ്മ, മാർക്കറ്റിംഗ്: സ്നേക്ക്പ്ലാന്‍റ് എൽ.എൽ.പി, പി.ആർ.ഓ: ഹെയിൻസ്.
