പാർവതി തിരുവോത്ത്, റിമ കല്ലിങ്കൽ, നക്ഷത്ര ഇന്ദ്രജിത് എന്നിവരെ പ്രധാനകഥാപാത്രങ്ങളാക്കി മേഘ രാമസ്വാമി സംവിധാനം ചെയ്ത ഷോർട്ട് ഫിലിം ആണ് ലാലന്നാസ് സോങ് അഥവാ ലാലന്നയുടെ പാട്ട്. ഫാമിലി, പാരഡൈസ് എന്നീ ചിത്രങ്ങൾ നിർമ്മിച്ച ന്യൂട്ടൺ സിനിമയാണ് ചിത്രം നിർമ്മിച്ചിരിക്കുന്നത്. ഒരു പെൺകുട്ടിയുടെ പിറന്നാളാഘോഷത്തിൽ പങ്കെടുക്കുന്ന രണ്ട് സ്ത്രീകളുടെയും അവർ അവിടെ വച്ച് കണ്ടുമുട്ടുന്ന ലാലന്ന എന്ന കുട്ടിയുമാണ് ചിത്രം മുന്നോട്ട് കൊണ്ട് പോകുന്നത്. ലാലന്ന എന്ന ടൈറ്റിൽ കഥാപത്രത്തെ അവതരിപ്പിക്കുന്നത് നക്ഷത്ര ഇന്ദ്രജിത്ത് ആണ്. സൈക്കോളജിക്കൽ ഡ്രാമയായ ചിത്രം സ്ട്രീമിംഗ് പ്ലാറ്റ്‌ഫോം ആയ മുബിയിൽ ലഭ്യമാണ്.
ഐഡിഎസ്എഫ്കെ, ഇന്ത്യൻ ഫിലിം ഫെസ്റ്റിവൽ ഓഫ് ലോസ് ആഞ്ചെലസ് തുടങ്ങിയ ചലച്ചിത്രമേളകളിൽ ചിത്രം പ്രദർശിപ്പിക്കപ്പെട്ടിരുന്നു. IFFLA -യിൽ ചിത്രം സ്പെഷ്യൽ ജൂറി മെൻഷൻ നേടുകയുമുണ്ടായി. ലാലന്നയുടെ പാട്ടിലെ പ്രകടനത്തിന് നക്ഷത്ര ഇന്ദ്രജിത്ത് മികച്ച നടിക്കുള്ള ക്രിട്ടിക്സ് ചോയ്സ് അവാർഡിന് നിർദേശിക്കപ്പെട്ടിരുന്നു. റിമ കല്ലിങ്കലും പാർവതി തിരുവോത്തും ആദ്യമായി സ്‌ക്രീനിൽ ഒന്നിക്കുന്ന ചിത്രം കൂടെയാണ് ലാലന്നാസ് സോങ്.
