ബോളിവുഡ് താരം കങ്കണ റണാവത്തിന്റെ 'ധാക്കഡ്' ബോക്‌സ് ഓഫീസില്‍ വലിയ പരാജയമാണ് ഏറ്റുവാങ്ങിയത്. പ്രേക്ഷകരില്‍ നിന്നും നിരൂപകരില്‍ നിന്നും ഒരുപോലെ മോശം പ്രതികരണമാണ് ചിത്രത്തിന് ലഭിച്ചത്. ഈ സാഹചര്യത്തില്‍ തിയേറ്ററുകളില്‍ നിന്ന് ചിത്രം പിന്‍വലിക്കുകയും ചെയ്തു. വലിയ മുതല്‍ മുടക്കില്‍ ചിത്രീകരിച്ച 'ധാക്കഡ്' പരാജയം നേരിട്ടതിനെ തുടര്‍ന്ന് കങ്കണയുടെ അടുത്ത ചിത്രമായ 'തേജസ്' ഡയറക്ട് ഒടിടി റിലീസിന് ഒരുങ്ങുകയാണെന്നാണ് പുറത്തുവരുന്ന പുതിയ റിപ്പോര്‍ട്ടുകള്‍.
'ധാക്കടി'ന്റെ പരാജയം കാരണമാണ് 'തേജസി'ന്റെ റിലീസ് നീട്ടി വെച്ചിരിക്കുന്നത്. ചിത്രത്തിന്റെ നിര്‍മ്മാതാക്കളായ ആര്‍.എസ്.വി.പി ഒടിടി റിലീസ് ചെയ്യാനാണ് തീരുമാനിച്ചിരിക്കുന്നതെന്ന് ബോളിവുഡ് ഹംഗാമ റിപ്പോര്‍ട്ട് ചെയ്യുന്നു. അതോടൊപ്പം തന്നെ 'തേജസി'ന്റെ ചില ഭാഗങ്ങള്‍ വീണ്ടും ചിത്രീകരിക്കുകയും ചെയ്യുന്നുണ്ട്. കങ്കണ റണാവത്തിന്റെ നിലവിലെ ബോക്‌സ് ഓഫീസ് റെക്കോര്‍ഡുകള്‍ അനുസരിച്ച് ചിത്രം ഒടിടി റിലീസ് ചെയ്യുന്നതായിരിക്കും ലാഭകരമെന്നാണ് നിര്‍മാതാക്കളുടെ നിഗമനമെന്നും റിപ്പോര്‍ട്ടില്‍ പറയുന്നു.
എന്നാല്‍ ഇക്കാര്യങ്ങള്‍ പൂര്‍ണ്ണമായും നിര്‍മാതാക്കളായ ആര്‍.എസ്.വി.പി നിഷേധിച്ചിരിക്കുകയാണ്. 'തേജസ്' തിയേറ്ററില്‍ തന്നെയായിരിക്കും റിലീസ് ചെയ്യുക. ഈ വര്‍ഷം ഒക്ടോബറില്‍ തിയേറ്ററില്‍ റിലീസ് ചെയ്യാനാണ് തീരുമാനിച്ചിരിക്കുന്നത്. 'തേജസി'ന്റെ ചില ഭാഗങ്ങള്‍ കൂടി ചിത്രീകരണം പൂര്‍ത്തിയാക്കാനുണ്ട്. അതിന് ശേഷം ഒക്ടോബര്‍ 5ന് ചിത്രം പ്രേക്ഷകരിലേക്ക് എത്തിക്കാനാണ് നിലവില്‍ തീരുമാനമായിരിക്കുന്നതെന്ന് നിര്‍മാതാക്കള്‍ ബോളിവുഡ് ഹംഗാമയോട് പറഞ്ഞു.
