'മന്ദാകിനി'ക്ക് ശേഷം അൽത്താഫ് സലീമും അനാർക്കലി മരക്കാരും വീണ്ടും ഒരുമിക്കുന്ന ഇന്നസെന്റ് എന്ന സിനിമയിലെ പ്രൊമോ ഗാനം ശ്രദ്ധ നേടുന്നു. മലയാളികളുടെ സ്വന്തം ഉണ്ണിയേട്ടൻ എന്ന് അറിയപ്പെടുന്ന ലിപ് സിങ്ക് വീഡിയോകളിലൂടേ തരംഗമായ കിലി പോൾ ആണ് ഈ ഗാനം പാടി അഭിനയിച്ചിരിക്കുന്നത്. വലിയ പ്രേക്ഷക ശ്രദ്ധയാണ് ഈ ഗാനത്തിന് ലഭിച്ചിരിക്കുന്നത്. ആറു ദിവസങ്ങൾ കൊണ്ട് ഒരു മില്യൺ വ്യൂസാണ് ഗാനത്തിന് ലഭിച്ചിരിക്കുന്നത്.
കാക്കേ കാക്കേ എന്ന സുപരിചിതമായ പാട്ട് ഒരു കച്ചേരി സ്റ്റൈലിൽ കിലി പോൾ രസകരമായി പാടി കൊണ്ടാണ് ഗാനം ആരംഭിക്കുന്നത്. പെട്ടെന്ന് സ്റ്റൈലിഷ് ലുക്ക് ലേക്ക് കിലി ഷിഫ്റ്റ് ആയി അവിടെ പൊട്ടാസ് പൊട്ടിത്തെറി ഫാസ്റ്റ് ട്രാക്കിലുള്ള ഗാനം ആരംഭിക്കുന്നു. ടാർസാനിയൻ വേഷത്തിലാണ് ഫാസ്റ്റ് നമ്പറിൽ കിലി പോളും സംഘവും പ്രത്യക്ഷപ്പെടുന്നത്. ഒപ്പം മോഡേൺ സ്റ്റൈലിഷ് ലുക്കിലും കിലി പോളിനെ കാണാം. ജാസി ഗിഫ്റ്റും അനാർക്കലി മരക്കാരും കിലി പോളും ചേർന്ന് ആലപിക്കുന്ന ഈ ഗാനത്തിന്റെ വരികൾക്ക് സംഗീതം നൽകിയിരിക്കുന്നത് ജയ് സ്റ്റെല്ലറാണ്. വിനായക് ശശി കുമാറാണ് വരികളുടെ രചന നിർവഹിച്ചതിരിക്കുന്നത്.
ജോമോൻ ജ്യോതിർ, അസീസ് നെടുമങ്ങാട്, മിഥുൻ, നോബി, അന്ന പ്രസാദ്, ലക്ഷ്മി സ‌ഞ്ജു, വിനീത് തട്ടിൽ, അശ്വിൻ വിജയൻ, ഉണ്ണി ലാലു തുടങ്ങി നിരവധി താരങ്ങളാണ് ചിത്രത്തിൽ ഒരുമിക്കുന്നത്. എലമെന്‍റ്സ് ഓഫ് സിനിമയുടെ ബാനറിൽ എം ശ്രീരാജ് എ.കെ.ഡി നിർമ്മിക്കുന്ന സിനിമ സംവിധാനം ചെയ്യുന്നത് സതീഷ് തൻവിയാണ്. പ്രമുഖ താരങ്ങൾക്കൊപ്പം സിനിമയിൽ പ്രവർത്തിച്ചുകൊണ്ട് തന്നെ സിനിമ പഠിക്കുവാനുള്ള അവസരം വിദ്യാർത്ഥികൾക്ക് നൽകുന്ന ഇൻസ്റ്റിറ്റ്യൂട്ടായ ‘എലമെന്‍റ്സ് ഓഫ് സിനിമ’യുടെ ആദ്യ നിർമ്മാണ സംരംഭം കൂടിയാണ് ഈ ചിത്രം എന്ന പ്രത്യേകതയുമുണ്ട്. ജി. മാർത്താണ്ഡൻ, അജയ് വാസുദേവ്, ഡിക്സൺ പൊടുത്താസ്, നജുമുദ്ദീൻ എന്നിവരാണ് എക്സി.പ്രൊഡ്യൂസർമാർ.
ഷിഹാബ് കരുനാഗപ്പിള്ളിയുടെ കഥയ്ക്ക് ഷിഹാബും സർജി വിജയനും സതീഷ് തൻവിയും ചേർന്നാണ് തിരക്കഥയും സംഭാഷണവും ഒരുക്കിയിരിക്കുന്നത്. പൂർ‍ണ്ണമായും കോമഡി ജോണറിലുള്ളതാണ് ചിത്രം. ഛായാഗ്രഹണം: നിഖിൽ എസ് പ്രവീൺ, എഡിറ്റർ: റിയാസ് കെ ബദർ, സംഗീതം: ജയ് സ്റ്റെല്ലാർ, ഗാനരചന: വിനായക് ശശികുമാർ, കോസ്റ്റ്യൂം: ഡോണ മറിയം ജോസഫ്, മേക്കപ്പ്: സുധി സുരേന്ദ്രൻ, ആ‍ർട്ട്: മധു രാഘവൻ, ചീഫ് അസോസിയേറ്റ്: സുമിലാൽ സുബ്രഹ്മണ്യൻ, അനന്തു പ്രകാശൻ, പ്രൊഡക്ഷൻ കൺട്രോളർ: സുരേഷ് മിത്രക്കരി, ചീഫ് അസോസിയേറ്റ് ക്യാമറമാൻ: തൻസിൻ ബഷീർ, പബ്ലിസിറ്റി ഡിസൈൻ: യെല്ലോടൂത്ത്സ്, വിതരണം: സെഞ്ച്വറി ഫിലിംസ്, പിആർഒ: ആതിര ദിൽജിത്ത്.
