തൊടുപുഴയില് ഹാഷീഷ് ഓയിലുമായി പിടിയിലായ സിനിമ സ്റ്റില് ഫോട്ടോഗ്രാഫര് ആല്ബിന് ആന്റണി ഹൃദയം, ഭീഷ്മപര്വ്വം എന്നീ സിനിമകളുടെ ഫോട്ടോഗ്രാഫര് അല്ലെന്ന് ഫെഫ്ക. പത്രത്തിലും ദൃശ്യ മാധ്യമങ്ങളിലും വന്നിട്ടുള്ള വാര്ത്തയില് ഇയാള് ഭീഷ്മപര്വ്വം, ഓര്മ്മയുണ്ടോ ഈ മുഖം, ഹൃദയം എന്നീ സിനിമകളുടെ ഫോട്ടോഗ്രാഫര് ആണെന്നാണ് പറഞ്ഞിരിക്കുന്നത്. വാര്ത്തയില് വന്ന വസ്തുതാപരമായ പിശക് തിരുത്തണമെന്നാണ് ഫെഫ്ക ആവശ്യപ്പെട്ടിരിക്കുന്നത്.
ഹാസിഫ് ഹക്കീം, ബിജിത്ത് ധര്മ്മടം എന്നിവരാണ് ഈ ചിത്രങ്ങളുടെ യഥാര്ത്ഥ ഫോട്ടോഗ്രാഫര്മാര്. അവരെ വാര്ത്തയില് വന്ന പിശക് ബാധിച്ചതിനാലാണ് തിരുത്തല് ആവശ്യപ്പെട്ടുകൊണ്ട് ഫെഫ്ക ഔദ്യോഗിക പ്രസ്താവന പുറത്തിറക്കിയത്.
ഫെഫ്കയുടെ ഔദ്യോഗിക പ്രസ്താവനയുടെ പൂര്ണ്ണരൂപം:
ഇന്ന് മലയാള മനോരമ ദിനപ്പത്രത്തിലെ കൊച്ചി ആലപ്പുഴ എഡിഷനുകളില് ഉള്പ്പെടെയുള്ള പ്രിന്റ് / ദൃശ്യ മാധ്യമങ്ങളില് വന്നിട്ടുള്ള 'ഹാഷീഷ് ഓയലുമായി സിനിമ സെറ്റില് ഫോട്ടോഗ്രാഫര് പിടിയില്' എന്ന വാര്ത്തയില് വസ്തുതാപരമായി പിശകുകള് ഉണ്ട്.
മുന്പ് റിലീസായ ജനപ്രിയ സിനിമകളായ 'ഭീഷ്മപര്വ്വം', 'ഓര്മ്മയുണ്ടോ ഈ മുഖം', 'ഹൃദയം' എന്നീ സിനിമകളുടെ സ്റ്റില് ഫോട്ടോഗ്രാഫറാണ് ഹാഷീഷ് ഓയിലുമായി പിടിയിലായ ആല്ബിന് ആന്റണി എന്നാണ് വാര്ത്ത.
ഈ ചിത്രങ്ങളുടെ യഥാര്ത്ഥ സ്റ്റില് ഫോട്ടോഗ്രാഫര്മാര് ഫെഫ്ക സ്റ്റില് ഫോട്ടോഗ്രാഫേഴ്സ് യൂണിയന് അംഗങ്ങളായ ഹാസിഫ് ഹക്കീം, ബിജിത്ത് ധര്മ്മടം എന്നിവരാണ്. പിടിയിലായ ആല്ബിന് ആന്റണി ഈ ചിത്രങ്ങളുടെ സ്റ്റില് ഫോട്ടോഗ്രാഫര് അല്ലെന്ന് മാത്രമല്ല, ഇയാള്ക്ക് സ്റ്റില് ഫഓട്ടോഗ്രാഫേഴ്സ് യൂണിയനുമായി യാതൊരു ബന്ധവുമില്ല.
മാധ്യമങ്ങള് നല്കിയിട്ടുള്ള തെറ്റായ വാര്ത്ത മൂലം ഈ ചിത്രങ്ങളില് പ്രവര്ത്തിച്ച ഫോട്ടോഗ്രാഫര്മാര്ക്ക് വലിയ അവമതിപ്പ് ഉണ്ടായിട്ടുണ്ട്. ഈ കാര്യത്തിന്റെ ഗൗരവം കണക്കിലെടുത്ത് ഈ വാര്ത്ത പ്രസിദ്ധീകരിച്ചിട്ടുള്ള മാധ്യമങ്ങള് ആയതിനു ഒരു തിരുത്ത് പ്രസിദ്ധീകരിക്കണമെന്ന് അഭ്യര്ത്ഥിക്കുന്നു.