"എന്നെയും ഒരു പെണ്ണ് ഇതുപോലെ പറ്റിച്ചിട്ടുണ്ട്" യൂണിറ്റിലെ ഒരു ചേട്ടൻ ഇങ്ങനെ പറഞ്ഞു'; 'പെണ്ണ് കേസ്' സംവിധായകൻ ഫെബിൻ സിദ്ധാർഥ്

പെണ്ണ് കേസ് സിനിമയുടെ ചിത്രീകരണ വേളയിൽ താൻ അറിഞ്ഞ ഒരു വിവാഹത്തട്ടിപ്പ് അനുഭവം പങ്കുവെച്ച് സംവിധായകൻ ഫെബിൻ സിദ്ധാർഥ്. സിനിമയുടെ ചിത്രീകരണ സമയത്ത് യൂണിറ്റിൽ പ്രവർത്തിച്ചിരുന്ന ഒരു വ്യക്തി, തനിക്കും ഇത്തരമൊരു അനുഭവം ഉണ്ടായിട്ടുണ്ടെന്ന് പറഞ്ഞു. സിനിമയുടെ ചിത്രീകരണം പൂർത്തിയായി ഒരു മാസം പിന്നിടുമ്പോൾ, ആ പെൺകുട്ടിയെ മറ്റൊരു കേസിൽ പോലീസ് അറസ്റ്റ് ചെയ്തതായി വാർത്തകൾ വന്നുവെന്നും ഫെബിൻ. ക്യു സ്റ്റുഡിയോയ്ക്ക് നൽകിയ അഭിമുഖത്തിൽ സംസാരിക്കുകയായിരുന്നു ഫെബിൻ സിദ്ധാർഥ്.

ഫെബിൻ സിദ്ധാർഥിന്റെ വാക്കുകൾ:

“ഈ ചിത്രത്തിൽ ഇർഷാദ് ചെയ്തിരിക്കുന്നത് ഒരു പഞ്ചായത്ത് പ്രസിഡന്റിന്റെ വേഷമാണ്. ആ കഥാപാത്രം പരാതിയുമായി എത്തുന്നിടത്ത് നിന്നാണ് കഥ തുടങ്ങുന്നത്. നമ്മുടെ യൂണിറ്റിൽ ഒരു ചേട്ടൻ ഉണ്ടായിരുന്നു. ഷൂട്ട് നടക്കുന്ന വേളയിൽ ഒരുദിവസം അദ്ദേഹം എന്റെ അടുത്ത് വന്ന്, ‘ഇത് എന്താ കഥ, വിവാഹത്തട്ടിപ്പുമായി ബന്ധപ്പെട്ടതാണോ?’ എന്ന് ചോദിച്ചു. അത്തരമൊരു കഥയാണിത് എന്ന് ഞാൻ പറഞ്ഞപ്പോൾ, ‘എന്നെയും ഒരു പെണ്ണ് ഇതുപോലെ പറ്റിച്ചിട്ടുണ്ട്’ എന്ന് അദ്ദേഹം പറഞ്ഞു. സിനിമയുടെ ഷൂട്ട് കഴിഞ്ഞ് ഒരു മാസം കഴിഞ്ഞപ്പോൾ, ഈ ചേട്ടനെ പറ്റിച്ച പെൺകുട്ടിയെ പോലീസ് അറസ്റ്റ് ചെയ്തതായി വാർത്ത വന്നു. ആ പെൺകുട്ടിക്കെതിരെ പരാതി നൽകിയതും ഒരു പഞ്ചായത്ത് പ്രസിഡന്റായിരുന്നു. അത്തരമൊരു സംഭവം ഉണ്ടായി,” ഫെബിൻ സിദ്ധാർഥ് പറഞ്ഞു.

ഫെബിൻ സിദ്ധാർഥ് ആദ്യമായി സംവിധാനം ചെയ്യുന്ന ചിത്രമാണ് പെണ്ണ് കേസ്. ചിത്രത്തിന്റെ തിരക്കഥ ഒരുക്കിയിരിക്കുന്നത് രശ്മി രാധാകൃഷ്ണനും ഫെബിൻ സിദ്ധാർഥും ചേർന്നാണ്. നിഖില വിമൽ പ്രധാന വേഷത്തിലെത്തുന്ന ചിത്രത്തിൽ ഹക്കീം ഷാജഹാൻ, അജു വർഗീസ്, രമേഷ് പിഷാരടി, ഇർഷാദ് അലി, അഖിൽ കവലയൂർ, കുഞ്ഞികൃഷ്ണൻ, ശ്രീകാന്ത് വെട്ടിയാർ, ജയകൃഷ്ണൻ, പ്രവീൺ രാജ, ശിവജിത്, കിരൺ പീതാംബരൻ, ഷുക്കൂർ, ധനേഷ്, ഉണ്ണി നായർ, രഞ്ജി കങ്കോൽ, സഞ്ജു സനിച്ചൻ, ലാലാ മലപ്പുറം, ശ്രീരേഖ, അനാർക്കലി, ആമി, സന്ധ്യ മനോജ്, ലാലി എന്നിവരും ഭാഗമാകുന്നു.

ഇ4 എക്സ്പെരിമെന്റ്സ്, സി സ്റ്റുഡിയോസ്, ലണ്ടൻ ടാക്കീസ് എന്നീ ബാനറുകളിൽ മുകേഷ് ആർ. മേത്ത, ഉമേഷ് കെ. ആർ. ബൻസാൽ, രാജേഷ് കൃഷ്ണ, സി. വി. സാരഥി എന്നിവർ ചേർന്ന് നിർമിക്കുന്ന പെണ്ണ് കേസ് എന്ന ചിത്രത്തിന്റെ ഛായാഗ്രഹണം നിർവഹിച്ചിരിക്കുന്നത് ഷിനോസാണ്. ജ്യോതിഷ് എം., സുനു എ. വി., ഗണേഷ് മലയത്ത് എന്നിവർ സംഭാഷണം എഴുതിയിരിക്കുന്ന ചിത്രത്തിന്റെ സഹനിർമാണം അക്ഷയ് കെജ്രിവാളും അശ്വതി നടുത്തൊടിയും ചേർന്നാണ് നിർവഹിക്കുന്നത്. പ്രൊഡക്ഷൻ ഡിസൈനർ അർഷദ് നക്കോത്ത്, എക്സിക്യൂട്ടീവ് പ്രൊഡ്യൂസർ വിനോദ് രാഘവൻ, സംഗീതം അങ്കിത് മേനോൻ, എഡിറ്റർ ഷമീർ മുഹമ്മദ് എന്നിവരാണ് സിനിമയുടെ മറ്റ് അണിയറപ്രവർത്തകർ.