ജോജു ജോർജ്ജ് സംവിധാനം ചെയ്യുന്ന 'പണി' എന്ന ചിത്രത്തിൽ നിന്നും പിന്മാറിയതിനെക്കുറിച്ച് തുറന്ന് പറഞ്ഞ് ഛായാഗ്രാഹകൻ വേണു. അടിസ്ഥാനപരമായ കാര്യങ്ങളിലുള്ള അഭിപ്രായ വ്യത്യാസമാണ് സിനിമയിൽ നിന്ന് പിന്മാറനുള്ള കാരണം എന്ന് വേണു വ്യക്തമാക്കുന്നു. ചിത്രത്തിന്റെ സംവിധായകനായ ജോജു ജോർജും താനും തമ്മിൽ അടിസ്ഥാനപരമായ അഭിപ്രായ വ്യത്യാസങ്ങൾ നിരന്തരം ഉണ്ടാകുന്ന ഒരു സാഹചര്യം ഉണ്ടായിരുന്നു എന്ന് വേണു പറയുന്നു. മാത്രമല്ല ഇപ്പോഴും ചിത്രീകരണം നടന്നു കൊണ്ടിരിക്കുന്ന സിനിമയിൽ അത്രയും കാലയളവിൽ ജോലി ചെയ്യാനുള്ള ശാരീരകവും മാനസികവുമായുള്ള പ്രശ്നങ്ങൾ തനിക്ക് ഉണ്ടായിരുന്നു എന്നും വേണു വ്യക്തമാക്കി. കൗമുദി മൂവീസിന് നൽകിയ അഭിമുഖത്തിലാണ് വേണുവിന്റെ പ്രതികരണം.
വേണു പറഞ്ഞത്:
ഞാൻ ആ സിനിമയിൽ നിന്നും മാറിയെന്നുള്ളതാണ് അതിന്റെ സത്യാവസ്ഥ. അടിസ്ഥാനപരമായ കാര്യങ്ങളിലുള്ള അഭിപ്രായ വ്യത്യാസമാണ്. അതിന്റെ ഡയറക്ടറും ഞാനും തമ്മിൽ അത് നിരന്തരം ഉണ്ടാകുന്ന ഒരു അവസ്ഥയിലേക്ക് വന്നു. അത് മാത്രമല്ല എന്റെ കോൺട്രാക്ട് തീരുകയായിരുന്നു. ആ സിനിമയുടെ ഷൂട്ട് ഇപ്പോഴും നടന്നു കൊണ്ടിരിക്കുകയാണ്. എനിക്ക് അത്രയും നേരം നിൽക്കാനുള്ള ശാരീരികവും മാനസികവുമായുള്ള പ്രശ്നങ്ങൾ ഉണ്ടായിരുന്നു. അങ്ങനെയിരിക്കേ അതിനുള്ള നല്ലൊരു കാരണം ഉണ്ടായി. അതുകൊണ്ട് ഞങ്ങൾ അത് വേണ്ടെന്ന് വച്ചു. അതാണ് ഉണ്ടായത്.
നടൻ ജോജു ജോർജ് ആദ്യമായി സംവിധാനം ചെയ്യുന്ന ചിത്രമാണ് 'പണി'. ജോജുവിന്റെ പ്രൊഡക്ഷൻ കമ്പനിയായ അപ്പു പാത്തു പപ്പു പ്രൊഡക്ഷൻസിന്റെയും എ ഡി സ്റ്റുഡിയോസിന്റെയും ബാനറിൽ എം റിയാസ് ആദം, സിജോ വടക്കൻ എന്നിവർ ചേർന്ന് നിർമിക്കുന്ന ചിത്രം തൃശ്ശൂർ നഗരത്തിലെ രണ്ട് ഗുണ്ടാസംഘങ്ങളുടെ കഥയാണ് പറയുന്നത്. ചിത്രത്തിൽ ആദ്യം ക്യാമറമാനായി നിശ്ചയിച്ചിരുന്നത് വേണുവിനെയായിരുന്നു. പിന്നീട് അഭിപ്രായ ഭിന്നതകളെ തുടർന്ന് ചിത്രത്തിൽ നിന്ന് വേണു പിന്മാറിയിരുന്നു. ഇതിനെ തുടർന്ന് ചിലർ ഫോണിലൂടെ വേണുവിനെ ഭീഷണിപ്പെടുത്തുകയും വേണുവിനെ ഭീഷണിപ്പെടുത്തിയതിൽ പ്രതിഷേധിച്ച് ഛായാഗ്രാഹകരുടെ സംഘടനയായ സിനിമാട്ടോഗ്രാഫേഴ്സ് യൂണിയൻ ഓഫ് മലയാളം സിനിമ (കുമാക്ക്) പ്രതിഷേധം അറിയിക്കുകയും ചെയ്തിരുന്നു. എന്നാൽ ചിത്രത്തിൽ നിന്നും വേണുവിനെ പുറത്താക്കിയിട്ടില്ലെന്നും അദ്ദേഹം സ്വന്തം ഇഷ്ട പ്രകാരമാണ് പിന്മാറിയതെന്നും സംഭവത്തെക്കുറിച്ച് മുമ്പ് നടൻ ജോജു ജോർജ്ജ് പ്രതികരിച്ചിരുന്നു.
