പ്രഭാസിനെ നായകനാക്കി രാമായണത്തിന്റെ പശ്ചാത്തലത്തില്‍ ഓം റൗത്ത് തിരക്കഥയെഴുതി സംവിധാനം ചെയ്യുന്ന 'ആദിപുരുഷ് സ്ക്രീൻ ചെയ്യുന്ന തിയറ്ററുകളിൽ ഒരു സീറ്റ് ഹനുമാന് വേണ്ടി ഒഴിച്ചിടുമെന്ന് അണിയറപ്രവർത്തകർ. രാമായണം ചൊല്ലുന്നിടത്തെല്ലാം രാമന്റെ ഭക്തനായ ഹനുമാനുണ്ടാകും എന്ന വിശ്വാസപ്രകാരമാണ് ഇത്തരമൊരു തീരുമാനം കെെക്കൊള്ളുന്നതെന്ന് അണിയറപ്രവർത്തകർ അറിയിച്ചു. കൃതി സനോണ്‍, സെയ്ഫ് അലി ഖാന്‍, സണ്ണി സിംഗ് എന്നിവര്‍ പ്രധാന കഥാപാത്രങ്ങളാകുന്ന ചിത്രം ജൂണ്‍ 16ന് ഹിന്ദി, തമിഴ്, തെലുങ്ക്, കന്നട, മലയാളം എന്നീ ഭാഷകളില്‍ റിലീസ് ചെയ്യും.
കഴിഞ്ഞ ഒക്ടോബര്‍ 2 നാണ് ചിത്രത്തിന്റെ ടീസര്‍ റിലീസ് ചെയ്തത്. ടീസറില്‍ വിഎഫ്എക്സിന്റെ കുറഞ്ഞ നിലവാരത്തിന് സോഷ്യല്‍ മീഡിയയിലൂടെ കടുത്ത ട്രോളുകള്‍ ചിത്രത്തിന്റെ അണിയറപ്രവര്‍ത്തകര്‍ക്ക് ലഭിച്ചിരുന്നു. എന്നാല്‍ അതെല്ലാം പരിഹരിച്ചാണ് ഇപ്പോള്‍ പുതിയ ട്രെയ്ലര്‍ പുറത്തിറക്കിയിരിക്കുന്നത്. സീതാപഹരണവും രാമന്റെ ലങ്കയിലേക്കുള്ള യാത്രയും യുദ്ധവുമൊക്കെ ആണ് ട്രെയ്‌ലറിലെ കാഴ്ചകള്‍.
ടി-സീരിസ്, റെട്രോഫൈല്‍ ബാനറില്‍ ഭൂഷണ്‍ കുമാറും കൃഷ്ണകുമാറും ഓം റൗട്ടും ചേര്‍ന്നാണ് ചിത്രം നിര്‍മിക്കുന്നത്. സാഹോയ്ക്കും രാധേ ശ്യാമിനും ശേഷം നിര്‍മാതാവായ ഭൂഷണ്‍ കുമാറുമായുള്ള പ്രഭാസിന്റെ മൂന്നാമത്തെ പ്രോജക്ടാണ് ആദിപുരുഷ്. ഛായാഗ്രഹണം -ഭുവന്‍ ഗൗഡ, എഡിറ്റിങ് -അപൂര്‍വ്വ മോടിവാലെ, ആഷിഷ് എം. ഹത്രെ. സംഗീതം -അജയ്-അതുല്‍, രവി ബസ്റൂര്‍ പശ്ചാത്തല സംഗീതം -സഞ്ചിത് ബല്‍ഹാറ, അങ്കിത് ബല്‍ഹാറ
