ആ ഷോട്ട് കഴിഞ്ഞപ്പോൾ അനുരാജ് കരഞ്ഞുകൊണ്ട് കട്ട് വിളിച്ചു, അതൊരു ബഹുമതിയായാണ് എനിക്ക് തോന്നിയത്: നരിവേട്ടയെക്കുറിച്ച് ടൊവിനോ തോമസ്

ടൊവിനോ തോമസിനെ നായകനാക്കി അനുരാജ് മനോഹർ സംവിധാനം ചെയ്യുന്ന ചിത്രമാണ് നരിവേട്ട. ചിത്രത്തിൽ വർഗീസ് പീറ്റർ എന്ന പൊലീസ് കോൺസ്റ്റബിൾ ആയാണ് ടൊവിനോ എത്തുന്നത്. പൊലീസിന്റെ ഏകപക്ഷീയമായ ആക്രമണങ്ങളിലേക്കുള്ള സൂചനകൾ കാണിച്ചു കൊണ്ട് ചെങ്ങറ, മുത്തങ്ങ, പുഞ്ചാവി, നന്ദിഗ്രാമം പോലുള്ള ഭൂസമര ചരിത്രവും പ്രധാന വിഷയമാക്കിയാണ് നരിവേട്ട ഒരുങ്ങുന്നതെന്നാണ് സൂചനകൾ. നരിവേട്ടയിലെ ഒരു ലോങ് ഷോട്ട് സീൻ അഭിനയിക്കുന്ന സമയത്ത് കരഞ്ഞുകൊണ്ടാണ് സംവിധായകൻ അനുരാജ് മനോഹർ കട്ട് വിളിച്ചതെന്നും അതൊരു ബഹുമതിയായാണ് തനിക്ക് തോന്നിയതെന്നും നരിവേട്ടയുടെ പ്രസ്സ് മീറ്റിൽ സംസാരിക്കവേ ടൊവിനോ പറഞ്ഞു.

ടൊവിനോ തോമസ് പറഞ്ഞത്:

നരിവേട്ടയിൽ വലിയൊരു സീൻ ചെയ്യാനുണ്ടായിരുന്നു. ലോങ്ങ് ടേക്ക് ആയിരുന്നു അത്. സിനിമയിലേക്ക് വരുമ്പോൾ ഒരു പക്ഷേ അത് എഡിറ്റിൽ അതിന് കട്ട് വന്നിട്ടുണ്ടാവാം. പക്ഷേ അതൊരു മാസ്റ്റർ ഷോട്ട് പോലെ ഒരു ദിവസം നമ്മൾ രാവിലെ വന്ന് ഞാനും മൊത്തം ക്രൂവും ആ സീൻ ചെയ്യാനുള്ള മൂഡിൽ ആയിരുന്നു. ഇന്ന് എടുക്കാൻ പോകുന്ന സീൻ ഇതാണ് എന്ന് അറിഞ്ഞിട്ട്, മുഴുവൻ ക്രൂവും ഞാനും എല്ലാം വളരെ സൈലന്റ് ആയിരുന്നു. ആ സീൻ പെർഫോം ചെയ്ത് കഴിഞ്ഞപ്പോൾ അനുരാജ് കരഞ്ഞുകൊണ്ടാണ് കട്ട് വിളിച്ചത്. അനുരാജിന്റെ ശബ്ദം ഇടറി എന്നു പറയുന്നിടത്ത് എനിക്ക് അത് സ്പോട്ടിൽ വച്ച് പിഡബ്ല്യുഡി എനിക്ക് അവാർഡ് തന്ന് നി സുലൈമാൻ അല്ല ഹനുമാൻ ആണ് എന്ന് പറയുന്ന പോലെയുള്ള ഒരു അനുഭവം ആയിരുന്നു അത്.

വർഗീസ് പീറ്റർ എന്ന സാധാരണക്കാരനായ പൊലീസ് കൊൺസ്റ്റബിളിന്‍റെ ഔദ്യോഗിക ജീവിതത്തിലെയും വ്യക്തി ജീവിതത്തിലെയും കഥ പറഞ്ഞു പോകുന്ന സിനിമയാണ് നരിവേട്ട. ചിത്രത്തിൽ വർഗ്ഗീസ് പീറ്ററായി എത്തുന്നത് ടൊവിനോ തോമസ് ആണ്. വലിയ ക്യാൻവാസിൽ, വൻ ബജറ്റിൽ ഒരുങ്ങുന്ന നരിവേട്ടയിലൂടെ തമിഴ് താരം ചേരൻ ആദ്യമായി മലയാള സിനിമയിൽ എത്തുന്നു. സുരാജ് വെഞ്ഞാറമൂട്, പ്രിയംവദ കൃഷ്ണ, റിനി ഉദയകുമാർ, എന്നിവരും ചിത്രത്തിലുണ്ട്. ചിത്രത്തിന്റെ ഗാനവും ട്രെയിലറുമെല്ലാം ഇതിനോടകം തന്നെ യൂട്യൂബിൽ ട്രെൻഡിങ്ങിൽ ഇടം പിടിച്ചിട്ടുണ്ട്. നരിവേട്ടയുടെ തമിഴ്നാട് ഡിസ്ട്രിബ്യൂഷൻ ഏറ്റെടുത്തത് എജിഎസ് എന്റർടെയ്‌ൻമെന്റ് ആണ്.

എക്സിക്യൂട്ടീവ് പ്രൊഡ്യൂസർ- എൻ എം ബാദുഷ, ഛായാഗ്രഹണം- വിജയ്, സംഗീതം- ജേക്സ് ബിജോയ്, വരികൾ- കൈതപ്രം, എഡിറ്റർ- ഷമീർ മുഹമ്മദ്, ആർട്ട്‌- ബാവ, വസ്ത്രാലങ്കാരം- അരുൺ മനോഹർ, മേക്കപ്പ് - അമൽ സി ചന്ദ്രൻ, പ്രൊജക്റ്റ് ഡിസൈനർ- ഷെമിമോൾ ബഷീർ, പ്രൊഡക്ഷൻ ഡിസൈൻ- എം ബാവ, പ്രൊഡക്ഷൻ കൺട്രോളർ- സക്കീർ ഹുസൈൻ, സൗണ്ട് ഡിസൈൻ - രംഗനാഥ്‌ രവി, പി ആർ ഒ & മാർക്കറ്റിംഗ് - വൈശാഖ് വടക്കേവീട്, ജിനു അനിൽകുമാർ, ചീഫ് അസ്സോസിയേറ്റ് ഡയറക്ടർ- രതീഷ് കുമാർ രാജൻ, സൗണ്ട് മിക്സ്- വിഷ്ണു പി സി, സ്റ്റീൽസ്- ഷൈൻ സബൂറ, ശ്രീരാജ് കൃഷ്ണൻ, ഡിസൈൻസ്- യെല്ലോടൂത്ത്, മ്യൂസിക് റൈറ്റ്സ്- സോണി മ്യൂസിക് സൗത്ത്.