ഫ്യൂച്ചറിസ്റ്റിക് ആയ ഒരു സിനിമയായിരിക്കും 'ആട് 3' എന്ന് തിരക്കഥാകൃത്തും സംവിധായകനുമായ മിഥുൻ മാനുവൽ തോമസ്. ആട് 3 ഒരു വലിയ ബഡ്ജറ്റിൽ ഒരുങ്ങുന്ന സിനിമയായിട്ടായിരിക്കും എത്തുകയെന്നും പ്രേക്ഷകർ ഇഷ്ടപ്പെടുന്ന തരത്തിലുള്ള ഒരു പ്രധാനപ്പെട്ട ഴോണർ ഷിഫ്റ്റ് ചിത്രത്തിലുണ്ടാകുമെന്നും മിഥുൻ പറഞ്ഞു. ജെയിൻ യൂണിവേഴ്‌സിറ്റി സംഘടിപ്പിക്കുന്ന ദ സബ്മ്മിറ്റ് ഓഫ് ഫ്യൂച്ചർ 2025 മായി ബന്ധപ്പെട്ട് മലയാള സിനിമയുടെ ഭാവിയിലേക്കുള്ള യാത്ര എന്ന വിഷയത്തിൽ ദ ക്യു എഡിറ്റർ മനീഷ് നാരായണനോട് സംസാരിക്കുകയായിരുന്നു മിഥുൻ മാനുവൽ തോമസ്.
മിഥുൻ മാനുവൽ തോമസ് പറഞ്ഞത്:
ആട് 3 ഒരുപാട് വലിയ ഒരു സിനിമയായിട്ടാണ് വരുന്നത്. അതിനകത്ത് ഇപ്പോൾ സിനിമയിൽ വന്നു കൊണ്ടിരിക്കുന്ന തരത്തിൽ നിങ്ങൾ പ്രതീക്ഷിക്കാത്ത അല്ലെങ്കിൽ നിങ്ങൾക്ക് ഇഷ്ടമാകുന്ന ഒരു പ്രധാനപ്പെട്ട് ഴോണർ ഷിഫ്റ്റ് നമ്മൾ ആട് 3 ചെയ്യുന്നുണ്ട്. അതെന്താണെന്നുള്ളത് ഞാൻ ഇപ്പോൾ പറയുന്നില്ല. അതിന് വലിയ ഒരു ബഡ്ജറ്റ് വേണ്ടി വരും. അതിന് പ്രൊഡ്യൂസർ സമ്മതിച്ചിട്ടുണ്ട്. നമുക്ക് സാധ്യമായ ടെക്നോളജികൾ എല്ലാം ഉപയോഗിച്ചുകൊണ്ട് നമ്മൾ ചെയ്യാൻ പോകുന്ന ഒരു ഫ്യൂച്ചറിസ്റ്റിക്ക് ആയ അല്ലെങ്കിൽ ആ കാഴ്ചപ്പാടിലുള്ള ഒരു സിനിമയാണ് ആട് 3. എന്തുകൊണ്ട് അങ്ങനെ ചെയ്യുന്നു എന്നു ചോദിച്ചാൽ പ്രേക്ഷകരുടെ കാഴ്ച ശീലം മാറി എന്നതുകൊണ്ടാണ് അത്. കഴിഞ്ഞ വർഷത്തെ വിജയിച്ച മലയാള സിനിമയുടെ കണക്കെടുത്താൽ കണ്ടിട്ടില്ല, പറഞ്ഞിട്ടില്ലാത്ത കഥകളാണ് നമ്മൾ പറയുന്നത്. ഭ്രമയുഗവും, ഗഗനചാരിയും എല്ലാം നമ്മൾ കണ്ടിട്ടില്ലാത്ത തരത്തിലുള്ള സിനിമയാണ്. നമ്മൾ കണ്ടിട്ടില്ലാത്ത തരം സിനിമകൾ അവതരിപ്പിക്കുന്നതിലാണ് ഇപ്പോഴത്തെ ഫിലിംമേക്കേഴ്‌സ് ശ്രദ്ധ കൊടുക്കുന്നത്. എമ്പുരാന്റെ ടീസർ ഇന്നലെ വന്നു. നമ്മൾ കണ്ടിട്ടില്ലാത്ത തരത്തിലാണ് ആ സിനിമയുടെ കാൻവാസ്‌. ടെക്നോളജി ഒരു പരിവധി വരെ ഇന്ന് നമുക്ക് അഫോർഡബിൾ ആണ്. അതിന്റെ സാധ്യതകൾ ഉപയോഗിച്ചു കൊണ്ട് നമ്മൾ ആട് 3 യിലേക്ക് കടക്കുകയാണ്. എവിടെയോ തുടങ്ങിയ ഒരു പാവം വടംവലിക്കാർ ആട് 3 എത്തുമ്പോഴേക്കും അവരുടെ പോക്കും യാത്രകളും എങ്ങോട്ടാണെന്നുള്ളത് നിങ്ങൾക്കെല്ലാം വളരെ സർപ്രൈസിംഗ് ആയിരിക്കും.
