യുക്രൈനിലെ ഇന്ത്യക്കാരുടെ അവസ്ഥ കമ്മിറ്റിക്ക് വെറും പിആര് സ്റ്റണ്ട് മാത്രമാണോ ? | Committe Talk | S2 Ep4
യുക്രൈനിലെ റഷ്യന്‍ അധിനിവേശത്തില്‍ ഇന്ത്യക്കാര്‍ പെട്ട് കിടക്കുമ്പോള്‍ കമ്മിറ്റി എന്ത് ചെയ്യണം. കമ്മിറ്റി സെക്രട്ടറിക്ക് ജയ് വിളിക്കണം.
കമ്മിറ്റിയുടെ പ്രധാന പ്ലേഗ്രൗണ്ടായ ഉത്തര്‍പ്രദേശിലെ തെരഞ്ഞെടുപ്പ് പ്രചാരണങ്ങളില്‍ കമ്മിറ്റി സെക്രട്ടറി ഓടിനടന്ന് വീരനുണക്കഥകള്‍ പാടിനടന്നുകൊണ്ടിരിക്കെയാണ് യുക്രൈനും റഷ്യയും തമ്മിലുള്ള പ്രശ്‌നം രൂക്ഷമാകുന്നത്. ഇവിടെ ഇന്ത്യേല്, നമ്മട കര്‍ണാടകയില്‍, ഹിജാബിന്റെ പേരില്‍ മുസ്ലിം പെണ്‍കുട്ടികളെ പുറത്തിരുത്തിയത് പോലും അറിയാത്ത കമ്മിറ്റി സെക്രട്ടറി എങ്ങനെയാണ് അങ്ങ് ദൂരെ റഷ്യേല് നടക്കണ പ്രശ്‌നോക്കെ അപ്പത്തന്നെ അറിയുന്നത്, സംഗതി വേള്‍ഡ് ടൂറ് സെക്രട്ടറിക്ക് ഒരു വീക്‌നെസാണെങ്കിലും ഇലക്ഷന് സമയത്ത് കമ്മിറ്റിക്ക് അതിന്റേതായ തിരക്കുകളില്ലേ, അതോണ്ട് ലേശം വൈകിയാലും കമ്മിറ്റി ഒന്നും ചെയ്തില്ലാന്ന് പറയരുത്.
ഇവിടെ യുപി എന്ന് പറയുന്നത് കമ്മിറ്റിയുടെ വെറും പ്ലേഗ്രൗണ്ട് മാത്രമല്ല, ഇന്ത്യ എങ്ങനെ ആവണമെന്നുള്ള കമ്മിറ്റിടെ വിഷന്‍ തുടങ്ങുന്നത് തന്നെ ഈ രാമരാജ്യത്ത് നിന്നാണെന്ന് അറിയാലോ, അപ്പോ പിന്നെ രാമരാജ്യം കഴിഞ്ഞല്ലേ കമ്മിറ്റി വേറെ രാജ്യം അന്വേഷിക്കൂ,
അങ്ങനെ രാമരാജ്യ നിര്‍മാണത്തിനായി ആദ്യം കമ്മിറ്റിയുടെ യുപി ഘടകം സെക്രട്ടറി നല്ല പച്ചഭീഷണിയായിട്ട് കമ്മിറ്റിക്ക് വോട്ട് ചെയ്തില്ലേ ഇവിടം കേരളമായിപ്പോകൂന്ന് പറഞ്ഞ് നോക്കി, രാമരാജ്യം കേരളമെങ്ങാനും ആയിപ്പോയാപ്പിന്നെ അറിയാലോ, മികച്ച ആരോഗ്യസംവിധാനം, ഭരണമികവ്, മതസൗഹാര്‍ദ്ദം, എന്റെ പൊന്നോ... കമ്മിറ്റിക്ക് ഓര്‍ക്കാന്‍ പോലും വയ്യ, അതിന് പിന്നാലെ കമ്മിറ്റി സെക്രട്ടറി തന്നെ വന്ന് ലോക്ഡൗണില്‍ സകലമാന പ്രശ്‌നങ്ങളും ഉണ്ടാക്കിയതും കൊവിഡ് പരത്തിയതിനും കാരണം മൈഗ്രന്റ് വര്‍ക്കേഴ്‌സ് കിലോമീറ്ററുകളോളം നടന്ന് വീട്ടിലേക്ക് പോകാന്‍ ശ്രമിച്ചതാണെന്ന് പറഞ്ഞ് നോക്കി, പക്ഷേ എന്താന്ന് അറിയില്ല പഴയപോലെ കമ്മിറ്റിടെ തള്ളിനൊരു തള്ളലില്ല. അപ്പോ പിന്നെ പണ്ട് ബ്രിട്ടീഷുകാര്‍ക്ക് മുന്നില്‍ മാപ്പെഴുതി കൊടുത്ത് ദേശഭക്തി തെളിയിച്ച കമ്മിറ്റി ആചാര്യനെ പ്രണമിച്ചുകൊണ്ട് കമ്മിറ്റി കമ്മിറ്റിടെ അവസാന ആയുദ്ധം കൈയ്യിലെടുത്തു. ദേശീയത.
പുല്‍വാമയില്‍ സൈനികര്‍ കൊല്ലപ്പെട്ടതും ഉറി ഭീകരാക്രമണവും സര്‍ജിക്കല്‍ സ്‌ട്രൈക്കുമെല്ലാം മുന്‍പ് പ്രചരണത്തില്‍ യുസ് ചെയ്തിട്ടുള്ള കമ്മിറ്റിക്ക് യുക്രൈനെങ്കി യുക്രൈന്‍.
യുക്രൈനില്‍ ഇന്ത്യന്‍ വിദ്യാര്‍ഥികള്‍ എന്ത് ചെയ്യണമെന്ന് അറിയാത്ത നിലയിലാണ്, ഇന്ത്യന്‍ എംബസിയില്‍ വിളിച്ചാല്‍ കിട്ടുന്നില്ലെന്ന് പരാതികളുണ്ട്, എന്ത് ചെയ്യണമെന്ന് നിര്‍ദേശങ്ങള്‍ ലഭിക്കുന്നില്ല, റഷ്യന്‍ ആക്രമണത്തില്‍ ഒരു വിദ്യാര്‍ഥി കൊല്ലപ്പെട്ടു, ഭക്ഷണവും വെള്ളവുമില്ല, ദിവസങ്ങളായി ബങ്കറുകളില്‍ കഴിയുകയാണ്, യുക്രൈന്‍ സൈനികരില്‍ നിന്ന് അടക്കം മര്‍ദ്ദനങ്ങള്‍ നേരിടുന്നു, കിലോമീറ്ററുകളോളം നടന്ന് അതിര്‍ത്തികളിലെത്തിയിട്ട് പോലും അയല്‍രാജ്യങ്ങളില്‍ പ്രവേശിക്കാന്‍ പറ്റാതെ വരുന്നു. ഇച്ചിരിയെങ്കിലും കണ്ണിച്ചോരേം മനുഷ്യത്ത്വേം ഉള്ളവരാരേലും ആണേ ആദ്യം പിള്ളേരുടെ പ്രശ്‌നം നോക്കും, പക്ഷേ കമ്മിറ്റിക്ക് അത്തരം ദൂശീലോന്നും ഇല്ലാത്തകൊണ്ട് സെക്രട്ടറിയെ യുക്രൈനില്‍ നിന്നുള്ള പാലമാക്കാനുള്ള തിരക്കിലാണ് കമ്മിറ്റി.
സത്യത്തില്‍ ഈ മെഡിസിനൊക്കെ പഠിക്കാന്‍ ഇവിടെന്ന് പിള്ളേര് യുക്രൈനിലേക്ക് പോകണ്ട കാര്യോന്നുല്ലെന്നാണ് കമ്മിറ്റി സെക്രട്ടറിയുടെ അഭിപ്രായം, എന്തിനാണ് ഈ ചെറിയ രാജ്യത്ത് കിടന്ന് കഷ്ടപ്പെടുന്നത്, ഭാഷപോലും അറിയില്ല, ഇവര്‍ക്കൊക്കെ വേണ്ടി രാജ്യത്തെ പ്രൈവറ്റ് സെക്ടര്‍ എന്തുകൊണ്ട് ഇവിടെ മെഡിക്കല്‍ കോളേജ് കെട്ടുന്നില്ല എന്നാണ് സെക്രട്ടറിയുടെ സംശയം. പബ്ലിക് സെക്ടറിലുണ്ടാക്കിയാ പിന്നെ പ്രൈവറ്റ് കാര്‍ക്ക് കമ്മിറ്റി തന്നെ വിക്കണം, അപ്പോ പിന്നെ അവരാദ്യം ഉണ്ടാക്കുന്നതല്ലേ അതിലും നല്ലത്. എല്ലാത്തിനും കാരണം കമ്മിറ്റിക്ക് മുന്നേ രാജ്യം ഭരിച്ചിരുന്നവരാണെന്ന് പിന്നെ പറയാതെ തന്നെ അറിയാലോ. എല്ലാ തെറ്റുകളും തിരുത്താന്‍ കമ്മിറ്റിയുടെയും കമ്മിറ്റി സെക്രട്ടറിയുടെ ജീവിതം പിന്നെയും ബാക്കി.
ഈ യുദ്ധോക്കെ സെക്കന്റുകള്‍ കൊണ്ട് നിര്‍ത്താന്‍ ശേഷിയുള്ള ലോകനേതാവ് കമ്മിറ്റി സെക്രട്ടറി മാത്രമാണെന്ന് കമ്മിറ്റി യുപിയില് പ്രസംഗിക്കുന്നുണ്ട്, അത് പിന്നെ നമ്മുടെ കമ്മിറ്റി സെക്രട്ടറിയും റഷ്യന്‍ കമ്മിറ്റി സെക്രട്ടറിയും തമ്മിലുള്ള ബന്ധം രണ്ട് കമ്മിറ്റികള്‍ തമ്മിലുള്ള ബന്ധം കൂടിയാണല്ലോ, ഒരു കമ്മിറ്റിക്കാണല്ലോ മറ്റൊരു കമ്മിറ്റിയെ മനസിലാക്കാന്‍ പറ്റോളൂ. ഇന്ത്യന്‍ കമ്മിറ്റിയാണോ റഷ്യന്‍ കമ്മിറ്റിയാണോ ശരിക്കുള്ള കമ്മിറ്റി എന്നൊരു ചര്‍ച്ച വരുന്നത് വരെ കമ്മിറ്റികള്‍ രണ്ടും നല്ല സെറ്റായിരിക്കും.
അങ്ങനെ യുപിയിലെ ഇലക്ഷന് സമയത്ത് വീണ് കിട്ടിയ പിടിവള്ളി പോലെയാണ് കമ്മിറ്റിക്കൊരു ഇവാക്കുവേഷന്‍ കിട്ടുന്നത്. അപ്പോള്‍ തന്നെ കമ്മിറ്റിയും സെക്രട്ടറിയും കവടി നിരത്തി യുപിയിലെ തെരഞ്ഞെടുപ്പ് പോസ്റ്ററുകള് നോക്കി പ്രഖ്യാപനം നടത്തി ഓപ്പറേഷന്‍ ഗംഗ, കൊവിഡ് കാലത്ത് ഗംഗയുടെ ഒഴുകി നടന്ന ഡെഡ് ബോഡീസിനെക്കുറിച്ച് ആള്‍ക്കാര് മറന്ന് പോകാനാണ് ഇങ്ങനെയൊക്കെ പേരിട്ടതെന്ന് ചിലര് പറയുമായിരിക്കും, ബോധോള്ളവര്‍ക്കൊക്കെ എന്തും പറയാലോ. എന്നാലും നമുക്ക് പിന്നെ കിട്ടിയ സുവര്‍ണാവസരം മുതലാക്കാണ്ടിരിക്കാന്‍ പറ്റില്ലല്ലോ, എംബസി വിളിച്ചാല്‍ ഫോണെടുത്തില്ലെങ്കിലും പിള്ളേര് സ്വന്തം നിലക്ക് നടന്ന് അതിര്‍ത്തി കയറി കഷ്ടപ്പെട്ട് അപ്പുറത്തെത്തുമ്പോള്‍ അവിടെക്കേറി കുമ്മനടിക്കാന്‍ നോക്കുന്നതും കമ്മിറ്റി സെക്രട്ടറിക്ക് നാല് ജയ് വിളിക്കുന്നതിലെന്തെങ്കിലും പ്രശ്‌നമുണ്ടോ ? കമ്മിറ്റി സെക്രട്ടറിയുടെ തല കമ്മിറ്റി സെക്രട്ടറിയുടെ ഫുള്‍ ഫിഗര്‍ അതല്ലേ കമ്മിറ്റിടെ നയം.
ആരാണ് ഈ കമ്മിറ്റി, യുക്രൈനിലെ ഇന്ത്യക്കാരുടെ അവസ്ഥ കമ്മിറ്റിക്ക് വെറും പിആര് സ്റ്റണ്ട് മാത്രമാണോ, ആരാണ് ഈ കമ്മിറ്റി ?
