14 വര്‍ഷം നീണ്ട കരിയര്‍. 14 ഗ്രാന്‍ഡ്സ്ലാം കിരീടങ്ങള്‍, 7 വിംബിള്‍ഡണ്‍ കിരീടങ്ങള്‍. 5 യുഎസ് ഓപ്പണ്‍. 2 ഓസ്‌ട്രേലിയന്‍ ഓപ്പണ്‍. ടെന്നീസ് കോര്‍ട്ട് അടക്കിവാണ പീറ്റ് സാമ്പ്രാസിന്റെ നേട്ടങ്ങളുടെ പട്ടികയിലെ ആദ്യത്തെ വരികളില്‍ ചിലതാണിത്. 1993 മുതല്‍ 98 വരെ നീണ്ട 6 വർഷത്തോളം ലോക ടെന്നീസിന്റെ റാങ്കിങ് പട്ടികയിലെ അനിഷേധ്യനായ രാജാവ് അയാളായിരുന്നു. അയാളുടെ റാക്കറ്റില്‍ നിന്ന് തീയുണ്ടപോലെ പാഞ്ഞുചെല്ലുന്ന സെര്‍വുകളെ ടെന്നീസ് ലോകം ഭയന്ന കാലമായിരുന്നു അത്. ആ അതിമാരക സെര്‍വുകള്‍ അയാള്‍ക്കൊരു വിളിപ്പേര് ചാര്‍ത്തിക്കൊടുത്തു. 'പിസ്റ്റള്‍ പീറ്റ്'.
200 കിലോമീറ്റര്‍ പെര്‍ ഹവറായിരുന്നു സാമ്പ്രാസിന്റെ സെര്‍വിന്റെ വേഗത. ഈ മിന്നല്‍ സെര്‍വുകളും ഭീകരമായ ഫോര്‍ഹാന്‍ഡ് ഷോട്ടുകളും ക്വാര്‍ട്ട് നിറഞ്ഞ് കളിക്കാനുള്ള മെയ്വഴക്കവും സാമ്പ്രാസിനെ അജയ്യനാക്കി. 1993 മുതല്‍ 1998 വരെ റാങ്കിങ് പട്ടികയില്‍ ഒന്നാം സ്ഥാനത്ത് നിലയുറപ്പിക്കാന്‍ സാമ്പ്രാസിനെ പ്രാപ്തനാക്കിയത് ഈ ഓള്‍റൗണ്ട് മികവായിരുന്നു. ഈ കാലയളവില്‍ 11 മേജര്‍ കിരീടങ്ങളാണ് സാംപ്രാസ് സ്വന്തമാക്കിയത്. 2002ലെ യുഎസ് കിരീടനേട്ടത്തോടെയാണ് 14 സംവത്സരങ്ങള്‍ നീണ്ട ആ കളിവിരുന്നിന് അവസാനമാകുന്നത്.
സാമ്പ്രാസ് അജയ്യനായിരുന്നു, അനിഷേധ്യനായിരുന്നു. ടെന്നിസ് കോർട്ടിൽ അയാള്‍ ഒരു ചെകുത്താനായിരുന്നു. തീപ്പന്തമാകുന്ന സെര്‍വുകള്‍ കൊണ്ട് ലോകടെന്നീസിനെ അമ്പരപ്പിച്ച് കളം വിട്ടുപോയ സാംപ്രാസ് ലോകടെന്നീസിലെ എക്കാലത്തെയും മികച്ച താരങ്ങളിലൊരാളായി നിലനില്‍ക്കുക തന്നെ ചെയ്യും.
