പ്രവാസി കുടുംബങ്ങളിൽ വർദ്ധിച്ചുവരുന്ന അരക്ഷിതാവസ്ഥയും, അസ്വസ്ഥതയും കണക്കിലെടുത്ത് സാമൂഹ്യ- കുടുംബ സുരക്ഷ ബോധവൽക്കരണ പരിപാടികൾ ശക്തിപ്പെടുത്തി ഷാർജ ഇന്ത്യൻ അസോസിയേഷൻ. ഒറ്റപ്പെട്ടവർക്ക് ഒരു കൈ നീട്ടുക, ആരും ഒറ്റപ്പെടുന്നില്ലെന്ന് ഉറപ്പു നൽകുക എന്നീ ലക്ഷ്യങ്ങൾ മുൻനിർത്തി പ്രൊഫഷണൽ കൗൺസിലിംഗ്, നിയമ, സാമ്പത്തിക മാർഗ്ഗ നിർദ്ദേശങ്ങൾ എന്നിവ ഉറപ്പാക്കുന്നതാണ് റൈസ് സംരംഭം. വിഷയം പ്രവാസി കുടുംബങ്ങൾ ഗൗരവമായി ഉൾക്കൊള്ളുന്നുണ്ട് എന്നും, സാമ്പത്തിക പ്രശ്നങ്ങളാണ് മിക്ക പ്രശ്നങ്ങൾക്കും കാരണമെന്നും,തർക്ക പരിഹാരങ്ങൾക്കും, കൗൺസിലിങ്ങിനുമായി നിരവധി കുടുംബങ്ങൾ അസോസിയേഷന്‍റെ റൈസ് സംരംഭത്തിൽ രജിസ്റ്റർ ചെയ്യുന്നുണ്ട് എന്നും അസോസിയേഷൻ പ്രസിഡന്‍റ് നിസാർ തളങ്കര വാർത്താസമ്മേളനത്തിൽ പറഞ്ഞു.
സൗഹൃദങ്ങളില്ലാത്ത ഒറ്റപ്പെടലിൻ്റെ, നാലു ചുവരുകൾക്കുള്ളിൽ ഒതുങ്ങിപ്പോയ അണുകുടുംബങ്ങളായി മാറുന്നതിൻ്റെ, സാമൂഹ്യ ജീവിതത്തിൻ്റെ അപര്യാപ്തതയുടെ പ്രശ്നങ്ങളാണ് പുതിയ കാലത്തിൻ്റെ പ്രതിസന്ധിയെന്നും ശരിയായ മാർഗനിർദ്ദേശത്തിലൂടേയും, ഉപദേശത്തിലൂടെയും ആരോഗ്യകരമായ അന്തരീക്ഷം കുടുംബങ്ങളിൽ ഉണ്ടാക്കാൻ സാധിക്കുമെന്നും അസോസിയേഷൻ ജനറൽ സെക്രട്ടറി ശ്രീപ്രകാശും അഭിപ്രായപ്പെട്ടു. മനശാസ്ത്രഞ്ജർ, കൗൺസിലേഴ്സ് തുടങ്ങി കമ്യൂണിറ്റി സർവീസ് എന്ന രീതിയിൽ സംരംഭവുമായി സഹകരിക്കാൻ തയ്യാറുള്ള മുഴുവൻ പേരുടെയും സഹകരണം സ്വാഗതം ചെയ്യുന്നതായും ഭാരവാഹികൾ അറിയിച്ചു.
ഭാര്യയും ഭർത്താവും തമ്മിലുള്ള കുടുംബങ്ങൾക്കകത്തെ അസ്വസ്ഥത കുട്ടികളെയാണ് ഏറ്റവും കൂടുതൽ ബാധിക്കുന്നത്. ഇത് വലിയ ഒരു സാമൂഹിക പ്രശ്നമാണ്. അസോസിയേഷൻ ഭാരവാഹികൾ പറഞ്ഞു. ഇക്കാര്യം മുൻനിർത്തി പ്രത്യേക കൗൺസിലിങ്, ബോധവൽക്കരണ സെക്ഷനുകൾ ആരംഭിക്കുന്നതിന് അസോസിയേഷൻ ആലോചിക്കുന്നുണ്ട് എന്നും ബന്ധപ്പെട്ടവർ കൂട്ടിച്ചേർത്തു. ഷാർജയിൽ നിന്ന് മാത്രമല്ല യുഎഇയിലെ വിവിധഭാഗങ്ങളിൽ നിന്നും അന്വേഷണങ്ങൾ എത്തുന്നുണ്ട്. അവരെയെല്ലാം സഹായിക്കുന്നതിനുവേണ്ടി അസോസിയേഷൻ മുൻകൈയെടുത്ത് പ്രവർത്തിക്കുന്നുണ്ട്. പ്രവാസ മേഖലയിലെ കൂട്ടായ്മകളെല്ലാം ഈ ഉത്തരവാദിത്തം ഏറ്റെടുക്കാൻ തയ്യാറാകണം.
26 ഓളം കേസുകൾ ചുരുങ്ങിയ ദിവസത്തിനുള്ളിൽ തന്നെ തർക്ക പരിഹാര പാനലിന്‍റെ മുമ്പാകെ എത്തിയിട്ടുണ്ട്. ഇതിൽ ഭൂരിപക്ഷം മലയാളി കുടുംബങ്ങളാണ് - ഭാരവാഹികൾ വാർത്താസമ്മേളനത്തിൽ പറഞ്ഞു. കുടുംബവുമായി ബന്ധപ്പെട്ട സംഘർഷങ്ങൾ ക്രിയാത്മകവും സൗഹാർദ്ദപരവും രീതിയിൽ പരിഹരിക്കുന്നതിനും ഘടനാപരമായ മാർഗ്ഗ നിർദ്ദേശം തികച്ചും രഹസ്യ കൗൺസിലിംഗ്, ശക്തമായ പിന്തുണ എന്നിവ നൽകുകയുമാണ് പ്രോഗ്രാമിന്‍റെ ലക്ഷ്യമെന്ന് ട്രഷറർ ഷാജി ജോൺ പറഞ്ഞു. പരിചയസമ്പന്നരായ കൗൺസിലർമാരും വിദഗ്ധരുമാണ് ടീമിൽ ഉള്ളത്. ഇന്ത്യൻ കോൺസുലേറ്റ് ,ഷാർജ പോലീസ് കമ്മ്യൂണിറ്റി പ്രിവന്‍റീവ് ആൻഡ് പ്രൊട്ടക്ഷൻ ഡിപ്പാർട്ട്മെൻ്റ് എന്നിവരുമായി ഏകോപിപ്പിച്ചാണ് ഷാർജ ഇന്ത്യൻ അസോസിയേഷന്‍റെ സംരംഭം. കേരള സർക്കാറുമായി ബന്ധപ്പെട്ട കാര്യങ്ങൾക്ക് നോർക്ക പൂർണ്ണ പിന്തുണയും വാഗ്ദാനം ചെയ്തിട്ടുണ്ട് എന്നും ഭാരവാഹികൾ വാർത്താ സമ്മേളനത്തിൽ അറിയിച്ചു.
