നാല് ദിവസത്തെ ചരിത്ര സന്ദ‍ർശനം പൂർത്തിയാക്കി പോപ് ഫ്രാന്‍സിസ് മാർപാപ്പ ബഹ്റൈനില്‍ നിന്നും മടങ്ങി. രാവിലെ 11 മണിയോടെയാണ് അദ്ദേഹം റോമിലേക്ക് തിരിച്ചത്. ബഹ്റൈന്‍ രാജാവ് ഹമദ് ബിന്‍ ഇസ അല്‍ ഖലീഫയുടെ ക്ഷണപ്രകാരം നവംബർ മൂന്നിനാണ് മാർപാപ്പ ബഹ്റൈനില്‍ എത്തിയത്.
ബഹ്റൈന്‍ ഡയലോഗ് ഫോറത്തില്‍ പങ്കെടുത്ത പാപ്പ മതനേതാക്കള്‍ മുറിവേറ്റ മനുഷ്യരോടൊപ്പം നില്‍ക്കണമെന്ന് ആഹ്വാനം ചെയ്തു. റഷ്യ ഉക്രൈന്‍ യുദ്ധപശ്ചാത്തലത്തില്‍ സമാധനത്തിനായി ശക്തമായ ആഹ്വാനം ചെയ്ത മാർപാപ്പ മതസ്വാതന്ത്ര്യവും മനുഷ്യാവകാശവും സംരക്ഷിക്കപ്പെടണമെന്നും ആവശ്യപ്പെട്ടു.
മനുഷ്യസ്നേഹത്തെകുറിച്ചാണ് 111 രാജ്യങ്ങളില്‍ നിന്നായി 30,000 ത്തോളം പേർ പങ്കെടുത്ത വിശുദ്ധ കുർബാനയില്‍ അദ്ദേഹം ഓ‍ർമ്മിപ്പിച്ചത്. ദൈവത്തിന്‍റെ സ്നേഹം പ്രചരിപ്പിക്കുന്നതില്‍ ആരും ക്ഷീണിതരാകരുതെന്നും അദ്ദേഹം പറഞ്ഞു. 2019 ല്‍ ഫ്രാന്‍സിസ് മാർപാപ്പ അബുദബി സന്ദർശിച്ചിരുന്നു.
