പൊതുസ്വകാര്യമേഖലകളിലെ സേവനങ്ങള്‍ ഡിജിറ്റല്‍വല്‍ക്കരിക്കാന്‍ യുഎഇ വൈസ് പ്രസിഡന്‍റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂം പുറത്തിറക്കിയ നിയമത്തിനനുസൃതമായി ഉപഭോക്താക്കള്‍ക്കായി സമ്പൂർണമായും ഡിജിറ്റല്‍വത്കരിച്ച സ്വകാര്യസർക്കാർ സേവനകേന്ദ്രം തുറന്നു. ഇസിഎച്ചിന്‍റെ നേതൃത്വത്തിലാണ് നൂറ് ശതമാനം സമ്പൂർണ പേപ്പർ രഹിത ഇടപാടുകൾ പ്രോത്സാഹിപ്പിക്കുന്ന ദുബായിലെ ആദ്യ സ്വകാര്യ സർക്കാർ സേവന കേന്ദ്രം തുറന്നത്.
ബിസിനസ്സ് സെറ്റപ്പ് മേഖലയിലെ പരമ്പരാഗത രീതികളെ മാറ്റുന്നതാണ് ഇ.സി.എച്ചിന്‍റെ പുതിയ ഡിജിറ്റൽ ഷോറൂം .ഏറ്റവും മികച്ച ഭാവി ലോകം രൂപപ്പെടുത്തുന്ന ദുബായ് ഭരണകൂടത്തിന്‍റെ ആശയങ്ങൾക്ക് പിന്തുണ നല്കാൻ കഴിയുന്നതിൽ അഭിമാനമുണ്ടെന്ന് ഇ.സി.എച്ച് സി.ഇ. ഒ ഇക്ബാല്‍ മാർക്കോണി പറഞ്ഞു . ഐ.ടി മേഖലയിൽ തൊഴിലവസരങ്ങൾ തേടുന്ന വിദ്ധഗദർക്ക് പുതിയ അവസരങ്ങൾ തുറക്കുന്നതായിരിക്കും ഇ.സി.എച്ചിന്‍റെ ഈ പുതിയ പദ്ധതിയെന്നും അദ്ദേഹം കൂട്ടിച്ചേർത്തു.
ദുബായിലെ സർക്കാർ വകുപ്പുകളിലെ ഉന്നത ഉദ്യാഗസ്ഥരുടെയും , അറബ് പ്രമുഖരുടെയും സാന്നിധ്യത്തിലാണ് ഖിസൈസില്‍ ഇ.സി.എച്ചിന്‍റെ ഡിജിറ്റൽ ഷോറൂം തുറന്ന് പ്രവർത്തനം ആരംഭിച്ചത്. ഈ വർഷം അവസാനം ദുബായിൽ അൽ ബർഷാ , ജുമേര, ജെ.ബി.ആർ എന്നിവിടങ്ങൾ മൂന്ന് പുതിയ ഡിജിറ്റൽ ഷോറൂമുകൾ കൂടി തുറന്നു പ്രവർത്തനമാരംഭിക്കും. കേന്ദ്രത്തില്‍ ഇരുപത് രാജ്യങ്ങളിലെ മുപ്പതിലധികം ഭാഷകൾ സംസാരിക്കുന്ന ജീവനക്കാരാണ് മികച്ച സേവനം ഉറപ്പുവരുത്തുന്നത്.
