കമ്മ്യൂണിസ്റ്റ് മാനിഫെസ്റ്റോ ഓഡര്‍ ചെയ്തയാള്‍ക്ക് ആമസോണ്‍ വഴി ലഭിച്ചത് ഭഗവത്ഗീത. കൊല്‍ക്കത്ത സ്വദേശി സുതീര്‍ത്ഥ ദാസിനുള്ള പുസ്തകത്തിലാണ് ആമസോണിന് അമളി പിണഞ്ഞത്. കഴിഞ്ഞ ബുധനാഴ്ചയാണ് ദാസ് മാനിഫെസ്റ്റോ ബുക്ക് ചെയ്തത്. ഉടന്‍ തന്നെ കണ്‍ഫര്‍മേഷന്‍ ലഭിക്കുകയും പുസ്തകം ലഭ്യമാക്കാനെടുക്കുന്ന സമയം ആമസോണ്‍ മറുപടിയായി അറിയിക്കുകയും ചെയ്തു. എന്നാല്‍ ശനിയാഴ്ച രാത്രി 11 മണിയോടെ അദ്ദേഹത്തെ ഒരു സ്ത്രീ വിളിച്ചു. തെറ്റായ പുസ്തകമാണ് അയച്ചിരിക്കുന്നതെന്നും ഓഡര്‍ റദ്ദാക്കണമെന്നും അഭ്യര്‍ത്ഥിച്ചു. അദ്ദേഹം ഈ സമയത്ത് ഓഫീസിലായിരുന്നതിനാല്‍ അതിന് സാധിച്ചില്ല.
വീട്ടില്‍ എത്തി പാക്കറ്റ് പൊളിച്ച് പരിശോധിച്ചു. ഇന്‍വോയ്‌സില്‍ കമ്മ്യൂണിസ്റ്റ് മാനിഫെസ്റ്റോ എന്നാണ് എഴുതിയിരിക്കുന്നതെങ്കിലും അതിലുള്ളത്, വിഖ്യാത പ്രസാധകരായ പെന്‍ഗ്വിന്‍ പുറത്തിറക്കിയ ഭഗവത്ഗീതയുടെ സംക്ഷിപ്ത പതിപ്പായിരുന്നു. ഇക്കാര്യം സുതീര്‍ത്ഥ ദാസ് തന്നെ ഫോട്ടോകള്‍ സഹിതം ഫെയ്‌സ്ബുക്കില്‍ പങ്കുവെച്ചു. ആവശ്യപ്പെട്ട പുസ്തകവും ലഭിച്ചതും തമ്മിലുള്ള വൈരുദ്ധ്യം ചൂണ്ടിക്കാട്ടി നിരവധി പേരാണ് ഇതോട് പ്രതികരിക്കുന്നത്.
