News n Views
‘അത് ദുഖകരം’; തന്റെ കാലത്തും മലയാളത്തില്‍ കാസ്റ്റിംഗ് കൗച്ച് ഉണ്ടായിരുന്നുവെന്ന് സുപര്‍ണ ആനന്ദ്
താന്‍ അഭിനയിച്ചിരുന്ന കാലത്തും മലയാള സിനിമയില്‍ കാസ്റ്റിംഗ് കൗച്ച് ഉണ്ടായിരുന്നുവെന്ന വെളിപ്പെടുത്തലുമായി വൈശാലി ഫെയിം സുപര്‍ണ ആനന്ദ്. കാസ്റ്റിംഗ് കൗച്ച് ദുഖകരമാണ്. ഇന്നും സിനിമ പുരുഷ കേന്ദ്രീകൃതമാണ്. പുരുഷ മേധാവിത്വമാണ് സിനിമയില്‍ നിലനില്‍ക്കുന്നത്. ഈ രംഗത്തെ വനിതാ കൂട്ടായ്മകളെ സ്വാഗതം ചെയ്യുന്നതായും അവര്‍ വ്യക്തമാക്കി.
ന്യൂസ് 18 ന് അനുവദിച്ച അഭിമുഖത്തിലായിരുന്നു നടിയുടെ പ്രതികരണം. അവസരം ലഭിച്ചാല്‍ മലയാളത്തില്‍ അഭിനയിക്കാന്‍ താല്‍പ്പര്യമുണ്ട്. ഇപ്പോഴത്തെ പ്രായത്തിന് അനുയോജ്യമായ സിനിമകള്‍ ലഭിച്ചാല്‍ മലയാളത്തില്‍ അഭിനയിക്കാന്‍ ആഗ്രഹമുണ്ട്. ഇതുവരെ പല ഭാഷകളില്‍ അഭിനയിച്ചിട്ടുണ്ടെങ്കിലും 30 വര്‍ഷത്തിനിപ്പുറവും മലയാളികള്‍ തന്നെ ഇഷ്ടപ്പെടുന്നുണ്ടെന്നും അവര്‍ വ്യക്തമാക്കി.
