Around us
അസം മുന് മുഖ്യമന്ത്രി തരുണ് ഗൊഗോയ് അന്തരിച്ചു
കോണ്ഗ്രസ് നേതാവും അസം മുന് മുഖ്യമന്ത്രിയുമായ തരുണ് ഗൊഗോയ് (86) അന്തരിച്ചു. ഗുവാഹത്തി മെഡിക്കല് കോളേജ് ആശുപത്രിയില് തിങ്കളാഴ്ച വൈകിട്ടായിരുന്നു അന്ത്യം. കൊവിഡ് ബാധിച്ച് പിന്നീട് നെഗറ്റീവ് ആയ തരുണ് ഗൊഗോയ് ആരോഗ്യപ്രശ്നങ്ങളെ തുടര്ന്ന് വെന്റിലേറ്ററിലായിരുന്നു.
നവംബര് രണ്ടിനാണ് അദ്ദേഹത്തെ ആശുപത്രിയില് പ്രവേശിപ്പിച്ചത്. ശനിയാഴ്ച ഉച്ചയ്ക്കു ശേഷം മുതല് ശ്വാസ തടസ്സം രൂക്ഷമാകുകയും ആരോഗ്യനില വഷളാകുകയുമായിരുന്നു. ഡല്ഹി എയിംസിലേക്ക് മാറ്റാന് ആലോചിച്ചെങ്കിലും ആരോഗ്യസ്ഥിതി വഷളായതിനാല് യാത്ര സാധ്യമല്ലെന്ന വിലയിരുത്തലില് ഉപേക്ഷിച്ചു.
2001 മുതല് 2016 വരെ തുടര്ച്ചയായി മൂന്നു തവണ അസം മുഖ്യമന്ത്രിയായിരുന്നു അദ്ദേഹം. 1934 ഒക്ടോബര് 11ന് അസമിലെ ജോര്ഹതിലായിരുന്നു ജനനം. ഡോളി ഗൊഗോയ് ആണ് ഭാര്യ. മക്കള്; ചന്ദ്രിമ, ഗൗരവ്.
