പ്ലസ് വണ് പരീക്ഷ നടത്താന് അനുമതി നല്കി സുപ്രീംകോടതി. കൊവിഡ് സാഹചര്യത്തില് പരീക്ഷ റദ്ദാക്കണമെന്ന് ആവശ്യപ്പെട്ടുള്ള ഹര്ജി കോടതി തള്ളി. പരീക്ഷ നടത്തുന്നതുമായി ബന്ധപ്പെട്ട് സംസ്ഥാന സര്ക്കാര് നല്കിയ വിശദീകരണം തൃപ്തികരമാണെന്നും കൊവിഡ് മാനദണ്ഡങ്ങള് പാലിച്ച് പരീക്ഷ സ്കൂളുകളില് നടത്താമെന്നും കോടതി പറഞ്ഞു.
ജസ്റ്റിസ് എ.എം.ഖാന്വില്ക്കര് അധ്യക്ഷനായ ബെഞ്ചിന്റേതാണ് ഉത്തരവ്. ഏഴ് ലക്ഷം പേര് ഓഫ്ലൈനായി നീറ്റ് പരീക്ഷ എഴുതിയത് പരാമര്ശിച്ചായിരുന്നു കേരളത്തിന്റെ ഹര്ജി അനുവദിച്ചത്. ഒക്ടോബറില് മൂന്നാം തരംഗം ഉണ്ടാകുന്നതിന് മുമ്പ് പരീക്ഷ പൂര്ത്തിയാക്കാമെന്നാണ് പ്രതീക്ഷയെന്ന് കേരളം ഫയല് ചെയ്ത സത്യവാങ്മൂലത്തില് പറഞ്ഞിരുന്നു.
സുപ്രീംകോടതി വിധി സ്വാഗതാര്ഹമാണെന്ന് വിദ്യാഭ്യാസമന്ത്രി വി.ശിവന്കുട്ടി പ്രതികരിച്ചു. പരീക്ഷ നടത്താന് സര്ക്കാര് സജ്ജമാണ്. കോടതി വിധിയുടെ വിശദാംശങ്ങള് ലഭ്യമായാല് മുഖ്യമന്ത്രിയുമായും മറ്റ് വകുപ്പുകളുമായും കൂടിയാലോചിച്ച് പരീക്ഷാ തിയതി നിശ്ചയിക്കുമെന്നും, തുടര്ന്ന് ടൈം ടേബിള് പ്രസിദ്ധീകരിക്കുമെന്നും മന്ത്രി പറഞ്ഞു.