നീതി തേടി ഹൈക്കോടതിയെ സമീപിച്ച അതിജീവിതയെ വിമര്ശിച്ച് മന്ത്രി ആന്റണി രാജു. ദിലീപും സര്ക്കാരും തമ്മില് അവിശുദ്ധ ബന്ധമുണ്ടെന്ന അതിജീവിതയുടെ ആരോപണത്തിന് പിന്നില് ഏതോ രാഷ്ട്രീയ ശക്തികളുണ്ടെന്ന് മന്ത്രി ആന്റണി രാജു. ഊഹാപോഹങ്ങളുടെ അടിസ്ഥാനത്തില് മറ്റ് ചില താല്പ്പര്യങ്ങള് വച്ച് കൊണ്ട് അതിജീവിതയെ ആരോ ഉപയോഗിക്കുകയാണെന്നും മന്ത്രി ആന്റണി രാജു.
മന്ത്രി ആന്റണി രാജുവിന്റെ വാക്കുകള്
ആ കേസിന്റെ അന്വേഷണം നടന്നുകൊണ്ടിരിക്കുകയാണ്. അന്തിമകുറ്റപത്രം നല്കിയിട്ടില്ല. എന്ന് മാത്രമല്ല ആ കേസിലെ പ്രതിയുടെ രാഷ്ട്രീയ പശ്ചാത്തലം എല്ലാവര്ക്കും അറിയാവുന്നതാണ്. കേസിന്റെ അന്വേഷണം പിണറായി വിജയന് സര്ക്കാര് ഭരിക്കുന്നിടത്തോളം നീതിയുക്തവും സത്യസന്ധവുമായിരിക്കും. ദിലീപും സര്ക്കാരും തമ്മില് അവിശുദ്ധ ബന്ധമുണ്ടെന്ന ആരോപണത്തിന് പിന്നില് ഏതോ രാഷ്ട്രീയ ശക്തികളുണ്ട്. തൃക്കാക്കര ഉപതെരഞ്ഞെടുപ്പ് വേളയില് മുമ്പ് ഇല്ലാത്ത ആരോപണം ബോധപൂര്വം കെട്ടിച്ചമക്കുകയാണ്.
ഈ കേസിലെ പ്രതിയായ ആളുടെ രാഷ്ട്രീയ പശ്ചാത്തലം എല്ലാവര്ക്കും അറിയാം. അദ്ദേഹത്തിന്റെ രാഷ്ട്രീയ ചായ്വ് എന്താണെന്ന് പൊതുസമൂഹത്തിന് നന്നായി അറിയാം. കുറ്റപത്രം നല്കുന്നതിന് മുമ്പ് വേണ്ടത്ര തെളിവില്ലെന്ന് എങ്ങനെ അറിയാം. മറ്റ് ചില താല്പര്യങ്ങളാണ് ഇതിന് പിന്നില്.