‘എങ്കില്‍ പാകിസ്താനില്‍ പോകൂ’ ; സുമയ്യ റാണയ്ക്കുനേരെ വിദ്വേഷ ആഹ്വാനവുമായി ബിജെപി നേതാവ്
പ്രമുഖ കവി മുനവര്‍ റാണയുടെ മകള്‍ സുമയ്യ റാണയോട് പാകിസ്താനില്‍ പോകൂവെന്ന് വിദ്വേഷ ആഹ്വാനവുമായി ബിജെപി നേതാവ് സതീഷ് ഗൗതം. ഇന്ത്യയില്‍ വീര്‍പ്പുമുട്ടല്‍ അനുഭവപ്പെടുന്നുണ്ടെങ്കില്‍ സുമയ്യയ്ക്ക് പാകിസ്താനില്‍ പോകാമെന്നായിരുന്നു അലിഗഡ് എംപികൂടിയായ സതീഷ് ഗൗതത്തിന്റെ വാക്കുകള്‍.
സുമയ്യ റാണയ്ക്ക് ഇന്ത്യയില്‍ വീര്‍പ്പുമുട്ടല്‍ തോന്നുന്നുണ്ടെങ്കില്‍ പാകിസ്താനില്‍ പോകാന്‍ നിരവധി വഴികള്‍ തുറന്നുകിടപ്പുണ്ട്. ഇന്ത്യയില്‍ ഒരാള്‍ക്ക് സ്വാതന്ത്ര്യത്തോടെ തുറന്ന് സംസാരിക്കാന്‍ അവസരമുണ്ട്. ഇങ്ങനെയായിരുന്നു സതീഷിന്റെ പ്രസ്താവന. രാജ്യാന്തരീക്ഷം വളരെ വിഷലിപ്തമാണെന്നും ഇത്തരമൊരു സാഹചര്യത്തില്‍ ജീവിക്കുന്നത് വീര്‍പ്പുമുട്ടലുണ്ടാക്കുന്നുവെന്നുമായിരുന്നു സുമയ്യയുടെ വാക്കുകള്‍.
പൗരത്വ ഭേദഗതി നിയമത്തിനെതിരായ പ്രതിഷേധ പരിപാടിയിലായിരുന്നു പരാമര്‍ശം. ഇതിനെതിരെയാണ് സുമയ്യ പാകിസ്താനില്‍ പോകൂ എന്ന വിദ്വേഷ വാദവുമായി സതീഷ് ഗൗതം രംഗത്തെത്തിയത്.
