മുഹമ്മദ് ഷമിയെ പിന്തുഷച്ച വിരാട് കോഹ്‌ലിയുടെ മകള്‍ക്ക് നേരെ ബലാത്സംഗ ഭീഷണി. കോഹ്‌ലിയുടെയും അനുഷ്‌ക ശര്‍മ്മയുടെയും പത്ത് മാസം മാത്രം പ്രായമുള്ള കുഞ്ഞിന് നേരെയായിരുന്നു ഭീഷണി. സംഭവത്തില്‍ ഇടപെട്ട വനിതാ കമ്മീഷന്‍ ഡല്‍ഹി പൊലീസിന് നോട്ടീസ് അയച്ചിട്ടുണ്ട്.
ട്വന്റി 20 വേള്‍ഡ് കപ്പ് മത്സരത്തില്‍ ഇന്ത്യ പാക്കിസ്താനോട് തോറ്റതിന് പിന്നാലെയായിരുന്നു മുഹമ്മദ് ഷമിക്കെതിരെ വലിയ തോതില്‍ സൈബര്‍ ആക്രമണങ്ങളും വിദ്വേഷ പ്രചരണവും ഉണ്ടായത്. നിരവധിപേര്‍ ഷമിക്ക് പിന്തുണയുമായി രംഗത്തെത്തിയിരുന്നു. ഇന്ത്യയ്ക്ക് വേണ്ടി മുഹമ്മദ് ഷമി ജയിച്ച കളികളെ കുറിച്ച് അറിവില്ലാത്തവരാണ് വിദ്വേഷപ്രചരണം നടത്തുന്നതെന്നായിരുന്നു കോഹ്‌ലി പറഞ്ഞത്. ഷമിക്ക് പിന്തുണ പ്രഖ്യാപിച്ചതിന് പിന്നാലെ കോഹ്‌ലിക്കെതിരെയും സൈബര്‍ ആക്രമണം ഉണ്ടായി.
കോഹ്‌ലിക്കും അനുഷ്‌കയ്ക്കും നേരെ നടന്ന സൈബര്‍ ആക്രമണം, പത്ത് മാസം മാത്രം പ്രായമായ മകള്‍ക്ക് നേരെയും തിരിയുകയായിരുന്നു. ഈ ട്വീറ്റ് നീക്കം ചെയ്‌തെങ്കിലും സ്‌ക്രീന്‍ഷോട്ട് സമൂഹമാധ്യമങ്ങളില്‍ പ്രചരിക്കുന്നുണ്ട്.
