കരിപ്പൂര്‍ വിമാനാപകടത്തില്‍ അടിയന്തര രക്ഷാ നടപടികള്‍ക്ക് മുഖ്യമന്ത്രി പിണറായി വിജയന്‍ നിര്‍ദേശം നല്‍കി. തദ്ദേശ സ്വയംഭരണ വകുപ്പ് മന്ത്രി എസി മൊയ്തീനോട് അടിയന്തരമായി സംഭവസ്ഥലത്തെത്തി രക്ഷാ പ്രവര്‍ത്തനങ്ങള്‍ക്ക് നേതൃത്വം നല്‍കാന്‍ മുഖ്യമന്ത്രി നിര്‍ദ്ദേശിച്ചു. അദ്ദേഹം തൃശൂരില്‍ നിന്ന് പുറപ്പെട്ടു.
ഐ ജി യുടെ നേതൃത്വത്തിലുള്ള പോലീസ് സന്നാഹവും രണ്ട് ജില്ലകളിലെ ഫയര്‍ ആന്‍ഡ് റെസ്‌ക്യൂ ടീമും രക്ഷാപ്രവര്‍ത്തനങ്ങളില്‍ പങ്കാളികളാവുന്നുണ്ട്. ആവശ്യമായ ആരോഗ്യ സംവിധാനവും സജ്ജമാക്കാന്‍ നിര്‍ദ്ദേശിച്ചിട്ടുണ്ട്. ദുരന്തനിവാരണത്തിന് സംസ്ഥാന സര്‍ക്കാരിന്റെ എല്ലാ സംവിധാനങ്ങളും ഉപയോഗിക്കണമെന്ന് നിര്‍ദ്ദേശിച്ചു. അപകടമരണങ്ങളില്‍ മുഖ്യമന്ത്രി അനുശോചനം രേഖപ്പെടുത്തി.
കരിപ്പൂരില്‍ വിമാനം അപകടത്തില്‍പ്പെട്ട് പൈലറ്റ് മരിച്ചു.സഹപൈലറ്റ് ഗുരുതരാവസ്ഥയിലാണ്. 177 യാത്രക്കാരുണ്ടായിരുന്നു.ആറു ജീവനക്കാരുമുണ്ട്. യാത്രക്കാരില്‍ 10 കുട്ടികളുമുണ്ട്.
റണ്‍വേയില്‍ നിന്നും തെന്നിമാറിയായിരുന്നു അപകടം. ലാന്‍ഡ് ചെയ്ത ശേഷം മുന്നോട്ട് നീങ്ങി അപകടത്തില്‍പ്പെടുകയായിരുന്നു. അപകട സമയത്ത് കനത്ത മഴയായിരുന്നു. അപകടത്തില്‍പ്പെട്ടവരെ ആശുപത്രിയിലേക്ക് മാറ്റുകയാണ്. ചിലരുടെ പരിക്ക് ഗുരുതരമാണെന്ന് സൂചന.
