കൊറോണയെ നേരിടാന്‍ ടാറ്റയുടെ 1500 കോടി
കൊറോണ വൈറസ് പ്രതിസന്ധിയെ നേരിടാന്‍ 1,500 കോടി രൂപയുടെ ധനസഹായം വാഗ്ദാനം ചെയ്ത് ടാറ്റാ ഗ്രൂപ്പ്. ട്വിറ്ററിലൂടെയാണ് രത്തന്‍ ടാറ്റ ഇക്കാര്യം ഔദ്യോഗികമായി അറിയിച്ചിരിക്കുന്നത്. കോവിഡ് -19 മഹാമാരിക്കെതിരായ പോരാട്ടത്തില്‍ രാജ്യത്തെ ഒരു ബിസിനസ് ഗ്രൂപ്പ് നല്‍കുന്ന ഏറ്റവും വലിയ ധനസഹായമാണിത്. ഇന്ത്യയിലും ലോകത്തെമ്പാടുമുള്ള നിലവിലെ സ്ഥിതി ഗൗരവതരമാണെന്നും അടിയന്തര നടപടി ആവശ്യമാണെന്നും ടാറ്റ ട്രസ്റ്റ് ചെയര്‍മാന്‍ രത്തന്‍ ടാറ്റ പറഞ്ഞു.
ലോകമെമ്പാടും നാശനഷ്ടമുണ്ടാക്കുന്ന കൊറോണ വൈറസ് വ്യാപനത്തിനെതിരെ രാജ്യം പോരാടുമ്പോള്‍, ടാറ്റ ട്രസ്റ്റുകളും ടാറ്റ ഗ്രൂപ്പും 1,500 കോടി രൂപ കൊറോണ പ്രതിരോധവുമായി ബന്ധപ്പെട്ട എല്ലാ പ്രവര്‍ത്തനങ്ങള്‍ക്കും സാമ്പത്തികമായി ഏറെ നഷ്ടം സംഭവിച്ച എല്ലാ സമുദായങ്ങളെയും സംരക്ഷിക്കുന്നതിനും ശാക്തീകരിക്കുന്നതിനുമായിട്ടാണ് സമര്‍പ്പിച്ചിരിക്കുന്നത്.
ടാറ്റ ട്രസ്റ്റുകള്‍ 500 കോടി രൂപയുടെ ഫണ്ടുകള്‍ മുന്‍നിരകളിലെ മെഡിക്കല്‍ ഓഫീസര്‍മാര്‍ക്ക് വ്യക്തിഗത സംരക്ഷണ ഉപകരണങ്ങള്‍ (പിപിഇ), വര്‍ദ്ധിച്ചുവരുന്ന കോവിഡ് -19 കേസുകള്‍ ചികിത്സിക്കുന്നതിനുള്ള ശ്വസന സംവിധാനങ്ങള്‍, ടെസ്റ്റിംഗ് കിറ്റുകള്‍, രോഗബാധിതരായവര്‍ക്കുള്ള മോഡുലാര്‍ ചികിത്സാ സൗകര്യങ്ങള്‍, നോളജ് മാനേജ്‌മെന്റ്, ആരോഗ്യ പ്രവര്‍ത്തകരുടെയും പൊതുജനങ്ങളുടെയും പരിശീലനം എന്നിവയ്ക്കായി വിനിയോഗിക്കുമെന്ന് ടാറ്റാ ഗ്രൂപ്പ് പുറത്തിറക്കിയ പ്രസ്താവനയില്‍ പറയുന്നു. ഇതോടൊപ്പം അനുബന്ധ പ്രവര്‍ത്തനങ്ങള്‍ക്കും തുടര്‍ നടപടികള്‍ക്കുമായി 1000 കോടി രൂപ കൂടി നല്‍കാനും തീരുമാനിച്ചിട്ടുണ്ടെന്ന് ടാറ്റ ട്രസ്റ്റ് ചെയര്‍മാന്‍ രത്തന്‍ ടാറ്റ വ്യക്തമാക്കി. കോവിഡ് -19 പ്രതിസന്ധി നാം നേരിടുന്ന ഏറ്റവും കഠിനമായ വെല്ലുവിളിയാണ്. ഈ നിമിഷത്തില്‍, ഒരു മണിക്കൂര്‍ എന്നത് മറ്റേതൊരു സമയത്തേക്കാളും വലുതാണ്,'' എന്ന് രത്തന്‍ ടാറ്റ ട്വീറ്ററില്‍ കുറിച്ചു.
ഗ്രൂപ്പിന്റെ മുഴുവന്‍ വൈദഗ്ധ്യവും കൊണ്ടുവരുന്നതിനായി കോവിഡ് -19 അനുബന്ധ എല്ലാ സംരംഭങ്ങളിലും ടാറ്റ ട്രസ്റ്റുകളുമായി കമ്പനി പ്രവര്‍ത്തിക്കുമെന്ന് ടാറ്റാ സണ്‍സ് ചെയര്‍മാന്‍ എന്‍ ചന്ദ്രശേഖരന്‍ പ്രത്യേക പ്രസ്താവനയില്‍ പറഞ്ഞു. രാജ്യത്ത് വര്‍ദ്ധിച്ചുവരുന്ന കൊറോണ വൈറസ് കേസുകള്‍ കാരണം വലിയ ഡിമാന്‍ഡിലുള്ള വെന്റിലേറ്ററുകള്‍ നിര്‍മ്മിക്കാന്‍ കോംപ്ലോമറേറ്റ് ഒരുങ്ങുന്നുണ്ടെന്നും അദ്ദേഹം കൂട്ടിച്ചേര്‍ത്തു.
