പ്രണവ് മോഹൻലാലിന് പിറന്നാൾ ആശംസകൾ നേർന്ന് സംവിധായകൻ അൽഫോൺസ് പുത്രൻ. പ്രണവിനൊപ്പമുള്ള കൂടിക്കാഴ്ചയെ കുറിച്ചുള്ള ഓർമ്മകൾ പങ്കുവെച്ചുകൊണ്ടായിരുന്നു അൽഫോൺസ് പുത്രൻ പിറന്നാൾ ആശംസകൾ നേർന്നത്. പ്രണവിനെപ്പോലൊരു മനുഷ്യനെ നൽകിയതിന് മോഹൻലാലിനും സുചിത്രയ്ക്കും അദ്ദേഹം നന്ദിയും അറിയിച്ചു.
പിറന്നാൾ ആശംസകൾ പ്രണവ് മോഹൻലാൽ. ഈ വർഷവും ഇനിയുള്ള വർഷങ്ങളും സുന്ദരവും സമൃദ്ധവുമാകട്ടെ. എന്റെ ഓഫീസിൽ കമ്പി പൊട്ടിയ ഒരു ഗിറ്റാർ ഉണ്ടായിരുന്നു. അതുകൊണ്ടു തന്നെ ഞാനും എന്റെ സഹപ്രവർത്തകരും ആ ഗിറ്റാർ മാറ്റിവെച്ചിരിക്കുകയായിരുന്നു. ഒരു സിനിമയുടെ കാര്യത്തിനായി പ്രണവിനെ കാണണം എന്നുണ്ടായിരുന്നു. സിജു വിൽസണോ കൃഷണശങ്കറോ ആണ് പ്രണവിനെ വിളിച്ചത്. അദ്ദേഹം വരുകയും ഞങ്ങൾ സംസാരിക്കുകയും ചെയ്തു. കുറച്ച് സമയം കഴിഞ്ഞപ്പോൾ അദ്ദേഹം ആ ഗിറ്റാറെടുത്ത് വായിക്കാൻ തുടങ്ങി. അതിഗംഭീരമായി അദ്ദേഹം ഗിറ്റാർ വായിച്ചു. കമ്പിയില്ലാത്ത ഗിറ്റാറിൽ നിന്നും സംഗീതം സൃഷ്ടിക്കാൻ സാധിക്കുമെന്ന പാഠം അദ്ദേഹമെന്നെ പഠിപ്പിച്ചു. ഉപകരണമല്ല അത് ഉപയോഗിക്കുന്നവനാണ് സംഗീതം സൃഷ്ടിക്കുന്നത്. മോഹൻലാൽ സർ, സുചിത്ര മാഡം പ്രണവിനെ പോലൊരു മനുഷ്യനെ തന്നതിന് നന്ദി- അൽഫോൺസ് പുത്രൻ