തലയെ വിട്ടു ഇനി തലൈവര്‍; ശിവയുടെ അടുത്ത ചിത്രം രജിനിക്കൊപ്പം
സൂപ്പര്‍ഹിറ്റ് സംവിധായകനായിരിക്കേ നിരവധി വിമര്‍ശനം നേരിട്ടയാളാണ് സിരുതൈ ശിവ എന്ന് വിളിക്കുന്ന ശിവ. വിവേഗം എന്ന ബിഗ് ബജറ്റ് ചിത്രം ബോക്‌സ് ഓഫീസില്‍ മൂക്കുകുത്തി വീണപ്പോഴും തമിഴകത്തിന്റെ തല അജിത് കുമാര്‍ വീണ്ടും ഡേറ്റ് നല്‍കിയ സംവിധായകന്‍ കൂടിയാണ് ശിവ. വിവേകത്തിന് പിന്നാലെയെത്തി വിശ്വാസം തമിഴിലെ ബമ്പര്‍ ഹിറ്റുമായിരുന്നു. മൂന്ന് ചിത്രങ്ങള്‍ക്കായി തുടര്‍ച്ചായി തലക്കൊപ്പം കൈകോര്‍ത്ത ശിവ ഇനി തലൈവര്‍ക്കൊപ്പമാണ്. രജിനികാന്ത് ദര്‍ബാര്‍ പൂര്‍ത്തിയാക്കി ചെയ്യുന്ന സിനിമ. തലൈവര്‍ 168 ശിവ സംവിധാനം ചെയ്യുമെന്ന് നിര്‍മ്മാതാക്കളായ സണ്‍ പിക്‌ചേഴ്‌സ് അനൗണ്‍സ് ചെയ്തു. സണ്‍ പിക്‌ചേഴ്‌സ് ഗ്രാഫിക്‌സ് പ്രമോയിലൂടെയാണ് ശിവ-രജിനികാന്ത് ചിത്രം പ്രഖ്യാപിച്ചത്.
എന്തിരന്‍, പേട്ട എന്നീ ചിത്രങ്ങള്‍ക്ക് ശേഷം രജിനിയെ നായകനാക്കി സണ്‍ പിക്‌ചേഴ്‌സ് നിര്‍മിക്കുന്ന ചിത്രം കൂടിയായിരിക്കും തലൈവര്‍168. ആദ്യമായിട്ടാണ് രജിനി ശിവയുടെ ചിത്രത്തില്‍ നായകനാകുന്നത്. വിശ്വാസത്തിന് ശേഷം ശിവ സംവിധാനം ചെയ്യുന്ന സിനിമയില്‍ സൂര്യ നായകനാകുമെന്ന് വാര്‍ത്തകള്‍ വന്നിരുന്നു. രജിനിക്കും ശിവയ്ക്കും ഒപ്പം കലാനിധി മാരനും വീഡിയോ പ്രമോയില്‍ ഉണ്ട്.
രജിനികാന്ത് ചിത്രം പേട്ടയും ശിവയുടെ അജിത് ചിത്രം വിശ്വാസവും തമ്മിലായിരുന്നു 2019ല്‍ ബോക്‌സ് ഓഫീല്‍ നേര്‍ക്കുനേര്‍ ഏറ്റുമുട്ടിയത്. പേട്ടയെ പിന്നിലാക്കുന്ന പ്രകടനമാണ് കളക്ഷനില്‍ വിശ്വാസം ബോക്‌സ് ഓഫീസില്‍ കാഴ്ച വച്ചത്. വീരം, വേതാളം, വിവേകം, വിശ്വാസം എന്നിവയാണ് ശിവ അജിത്തിനെ നായകനാക്കി സംവിധാനം ചെയ്ത സിനിമകള്‍. ശിവയുടെ സഹോദരനാണ് നടന്‍ ബാല.
എആര്‍ മുരുഗദോസ് സംവിധാനം ചെയ്യുന്ന ദര്‍ബാറാണ് രജിനിയുടെ അണിയറയില്‍ ഒരുങ്ങിക്കൊണ്ടിരിക്കുന്ന ചിത്രം. സിനിമയുടെ ഷൂട്ടിങ്ങ് പൂര്‍ത്തിയാക്കിയ രജിനി ശിവയുമായി കൈകോര്‍ക്കുന്നു എന്ന് നേരത്തെ വാര്‍ത്തകളുണ്ടായിരുന്നു. എന്നാല്‍ ഇന്നാണ് സണ്‍ പിക്‌ചേഴ്‌സ് ചിത്രത്തിന്റെ ഒദ്യോഗിക പ്രഖ്യാപനം നടത്തിയത്.
2020 പൊങ്കല്‍ റിലീസായി ഒരുങ്ങുന്ന ദര്‍ബാറില്‍ പൊലീസ് വേഷത്തിലാണ് രജിനിയെത്തുന്നത്. സന്തോഷ് ശിവന്‍ ഛായാഗ്രഹണം നിര്‍വഹിക്കുന്ന ദര്‍ബാറില്‍ നയന്‍താരയാണ് നായിക. സുനില്‍ ഷെട്ടി, നവാബ് ഷാ, നിവേദാ തോമസ് യോഗി ബാബു എന്നിവരും ചിത്രത്തിലുണ്ട്. അനിരുദ്ധ് രവിചന്ദറാണ് സംഗീതം. കാര്‍ത്തിക് സുബ്ബരാജ് രജിനി ചിത്രമായ പേട്ടയ്ക്ക് ശേഷം അനിരുദ്ധ് സംഗീതമൊരുക്കുന്ന സിനിമയുമാണ് ദര്‍ബാര്‍.
‘ദ ക്യു’ ഇപ്പോള്‍ ടെലഗ്രാമിലും ലഭ്യമാണ്. കൂടുതല്‍ വാര്‍ത്തകള്‍ക്കും അപ്‌ഡേറ്റുകള്‍ക്കുമായി ടെലഗ്രാം ചാനല്‍ സബ്‌സ്‌ക്രൈബ് ചെയ്യാം
