രാജ്യത്ത് കൊവിഡ് കണ്ടെയ്ന്‍മെന്റ് സോണുകളില്‍ മാത്രം നിയന്ത്രണങ്ങള്‍ ഏര്‍പ്പെടുത്തി ലോക്ക് ഡൗണ്‍ 30 വരെ നീട്ടി. എന്നാല്‍ ജൂണ്‍ 8 മുതല്‍ ഇളവുകള്‍ അനുവദിക്കും. മൂന്ന് ഘട്ടങ്ങളായുള്ള ഇളവുകളാണ് കേന്ദ്രസര്‍ക്കാര്‍ പ്രഖ്യാപിച്ചിരിക്കുന്നത്. കണ്ടെയ്ന്‍മെന്റ് സോണുകള്‍ക്ക് പുറത്തുള്ള ആരാധനാലയങ്ങളും ഷോപ്പിങ് മാളുകളും ഹോട്ടലുകളും ജൂണ്‍ 8 മുതല്‍ തുറക്കാം. വിദ്യാഭ്യാസ സ്ഥാപനങ്ങള്‍ തുറക്കുന്നത് രണ്ടാം ഘട്ടത്തിലായിരിക്കും. സംസ്ഥാനങ്ങളുമായി കൂടിയാലോചിച്ച ശേഷമായിരിക്കും അന്തിമ തീരുമാനം. മൂന്നാം ഘട്ടത്തില്‍ അന്താരാഷ്ട്ര വിമാനയാത്രകളും മെട്രോ ഗതാഗതവും പുനസ്ഥാപിക്കും.
സിനിമാ തിയേറ്ററുകളും ജിംനേഷ്യങ്ങളും പാര്‍ക്കുകളും, സ്വിമ്മിങ് പൂളുകളുമെല്ലാം തുറക്കും. പൊതുപരിപാടികള്‍ക്കും ഈ ഘട്ടത്തില്‍ അനുമതിയുണ്ടാകും. ഇതിന്റെ വിശദമായ മാര്‍ഗരേഖ പിന്നീട് പുറത്തിറക്കും. അതേസമയം കണ്ടെയ്ന്‍മെന്റ് സോണുകളില്‍ പൂര്‍ണമായ ലോക്ക്ഡൗണ്‍ ജൂണ്‍ 30 വരെ തുടരും. അവശ്യസര്‍വീസുകള്‍ക്ക് മാത്രമാണ് ഇവിടങ്ങളില്‍ അനുമതി. ഈ മേഖലയില്‍ യാത്രകള്‍ക്ക് നിരോധനമുണ്ട്. രാത്രി 9 മണി മുതല്‍ രാവിലെ 5 മണിവരെയുള്ള നൈറ്റ് കര്‍ഫ്യൂ കര്‍ശനമായി തുടരും. ഇവിടങ്ങളില്‍ അവശ്യസര്‍വീസുകള്‍ക്ക് ഇത് ബാധകമല്ല.
