Coronavirus

‘ആശങ്ക വേണ്ട’; അടച്ചിടല്‍ നീണ്ടു പോയാലും ആവശ്യമായ ഭക്ഷ്യധാന്യങ്ങള്‍ രാജ്യത്തുണ്ടെന്ന് എഫ്‌സിഐ ചെയര്‍മാന്‍ 

കൊവിഡ് 19ന്റെ പശ്ചാത്തലത്തില്‍ രാജ്യത്ത് ഭൂരിഭാഗം പ്രദേശങ്ങളില്‍ ഏര്‍പ്പെടുത്തിയിട്ടുള്ള ലോക്ക് ഡൗണ്‍ നീണ്ടു പോയാലും, ഭക്ഷ്യക്ഷാമം ഉണ്ടാകില്ലെന്ന് ഫുഡ് കോര്‍പറേഷന്‍ ഓഫ് ഇന്ത്യ ചെയര്‍മാന്‍ ഡിവി പ്രസാദ്. ദരിദ്രരുള്‍പ്പടെ പട്ടിണിയാകാതിരിക്കാനുള്ള കരുതല്‍ ശേഖരം രാജ്യത്തുണ്ടെന്നും ബ്ലൂംബര്‍ഗിന് അനുവദിച്ച അഭിമുഖത്തില്‍ ഡിവി പ്രസാദ് പറഞ്ഞു.

Also Read: ചാര്‍ജില്ലാതെ ഏത് എടിഎമ്മില്‍ നിന്നും പണം പിന്‍വലിക്കാം, മിനിമം ബാലന്‍സ് നിബന്ധന ഒഴിവാക്കിയടക്കം ഇളവുകള്‍ 

രാജ്യത്തെ വിവിധ ഗോഡൗണുകളിലായി ഏപ്രില്‍ അവസാനത്തോടെ 100 മില്യണ്‍ ടണ്‍ ഭക്ഷ്യധാന്യശേഖരമുണ്ടാകും. ഇതില്‍ 50 മില്യണ്‍ മുതല്‍ 60 മില്യണ്‍ വരെ ഭക്ഷ്യധാന്യങ്ങള്‍ പിന്നോക്ക വിഭാഗക്കാര്‍ക്ക് വിതരണം ചെയ്യുന്നതാണ്. 2019-20 സാമ്പത്തിക വര്‍ഷത്തില്‍ 292 മില്യണ്‍ ടണിന്റെ റെക്കോര്‍ഡ് ഉത്പാദനം രാജ്യത്ത് ഉണ്ടാകുമെന്നാണ് പ്രതീക്ഷിക്കുന്നതെന്നും ഡിവി പ്രസാദ് വ്യക്തമാക്കി.

ദ ക്യുഇപ്പോള്‍ ടെലഗ്രാമിലും ലഭ്യമാണ്. കൂടുതല്‍ വാര്‍ത്തകള്‍ക്കും അപ്‌ഡേറ്റുകള്‍ക്കുമായി ടെലഗ്രാം ചാനല്‍ സബ്‌സ്‌ക്രൈബ് ചെയ്യാം

അരിയുടെയോ ഗോതമ്പിന്റെയോ കാര്യമോര്‍ക്ക് രാജ്യത്തിന്റെ ഒരു ഭാഗത്തുമുള്ള ആളുകള്‍ ആശങ്കപ്പെടേണ്ടതില്ലെന്നും എഫ്‌സിഐ ചെയര്‍മാന്‍ വ്യക്തമാക്കി. ഇപ്പോഴും പല സംസ്ഥാനങ്ങളിലെയും ന്യായവില കേന്ദ്രങ്ങള്‍ക്ക് അവര്‍ക്ക് ആവശ്യമായ സാധനങ്ങള്‍ സൂക്ഷിച്ച് വെക്കാനുള്ള ശേഷിയില്ല. പൊതുവിതരണ സംവിധാനത്തിന്റെ ഗുണഭോക്താക്കള്‍ക്ക് ആറു മാസം വരെ ആവശ്യമായ ഭക്ഷ്യധാന്യങ്ങള്‍ മുന്‍കൂറായി വാങ്ങാമെന്ന് കേന്ദ്ര ഭക്ഷ്യ വിതരണ മന്ത്രി പറഞ്ഞിരുന്നു. നിലവിലെ സാഹചര്യത്തില്‍ ജനങ്ങള്‍ അവശ്യസാധനങ്ങള്‍ വാങ്ങിക്കൂട്ടുന്നത് വില ഉയരുവാന്‍ കാരണമാകുമോ എന്ന ആശങ്കയുണ്ടെന്നും ഡിവി പ്രസാദ് പറഞ്ഞു.

ദ ക്യു പ്രോഗ്രാമുകള്‍ക്കും വീഡിയോകള്‍ക്കുമായി ഞങ്ങളുടെ യൂട്യൂബ് ചാനല്‍ ഈ ലിങ്കില്‍ സബ്‌സ്‌ക്രൈബ് ചെയ്യാം