‘അവകാശം ഔദാര്യമല്ല’; ഭയപ്പെടുത്തുന്നവരെ പ്രതിരോധിച്ച് പരാജയപ്പെടുത്തണമെന്ന് ഹരീഷ് ശിവരാമകൃഷ്ണന്‍

പൗരത്വനിയമത്തിനെതിരെ നിലപാട് വ്യക്തമാക്കിയും രാജ്യവ്യാപകമായി നടക്കുന്ന പ്രക്ഷോഭത്തെ പിന്തുണച്ചും ഗായകന്‍ ഹരീഷ് ശിവരാമകൃഷ്ണന്‍. 'ഞങ്ങള്‍ സംയമനം ഉള്ള മതക്കാര്‍ ആയതു കൊണ്ടാണ് നിങ്ങള്‍ ഒക്കെ ഇക്കാലമത്രയും ഇപ്പോഴും ഇവിടെ ജീവിച്ചു പോകുന്നത്' എന്ന അഭിപ്രായം ഉള്ളവരുടെ ധാരണ തെറ്റാണെന്ന് ഹരീഷ് പറഞ്ഞു. ഇന്ന് ഈ രാജ്യത്തില്‍ ഒരു പൗരന് ലഭിക്കുന്ന സകല അധികാരങ്ങളോടും അവകാശങ്ങളോടും ജീവിക്കുന്നുണ്ടെങ്കില്‍ അത് ലഭിച്ചത് ഒരു മതത്തിന്റെയും സര്‍ക്കാരിന്റെയും ഔദാര്യം കൊണ്ടല്ല. മറിച്ചു നമ്മുടെ ഭരണഘടന ആ അധികാരം നമുക്ക് തന്ന കൊണ്ടാണെന്ന് ഗായകന്‍ ചൂണ്ടിക്കാട്ടി.

ദ ക്യു വീഡിയോ പ്രോഗ്രാമുകള്‍ക്കും വീഡിയോകള്‍ക്കുമായി ഞങ്ങളുടെ യൂട്യൂബ് ചാനല്‍ ഈ ലിങ്കില്‍ സബ്‌സ്‌ക്രൈബ് ചെയ്യാം

ഭരണഘടനക്കനുസരിച്ചു സകല അവകാശങ്ങളോടെ ഈ രാജ്യത്ത് ജീവിക്കാന്‍ നമുക്കാര്‍ക്കും ഒരു മതത്തിന്റെയും അനുവാദമോ ഔദാര്യമോ ആവശ്യമില്ല എന്നത് ഓര്‍ക്കണം. നിങ്ങളുടെ മക്കള്‍ക്ക് അത് പറഞ്ഞു മനസ്സിലാക്കിക്കൊടുക്കുക. മത ഭീകരതയെ മറ്റൊരു മതം കൊണ്ട് നേരിടാം എന്ന രാഷ്ട്രീയത്തെ നമ്മള്‍ ഈ കെട്ട കാലത്തു തിരിച്ചറിയേണ്ടതുണ്ട്. മതനിരപേക്ഷ രാഷ്ട്രം എന്നതു മാത്രമാണ് നമ്മള്‍ ലക്ഷ്യമാക്കേണ്ടത്. നമ്മളുടെ പ്രതിരോധവും അതായിരിക്കണം. കലക്ക വെള്ളത്തില്‍ ആര് മീന്‍ പിടിച്ചാലും അതിനെ ചെറുക്കേണ്ടതുണ്ടെന്നും ഹരീഷ് കൂട്ടിച്ചേര്‍ത്തു.